Javohir Sindarov xalqaro turnir saralash bosqichini birinchi o‘rinda yakunladi

Keyptaunda bo‘lib o‘tayotgan nufuzli turnirning saralash bosqichida o‘zbekistonlik 20 yoshli grossmeyster Magnus Karlsen va Fabiano Karuana kabi nomdor raqiblarni mag‘lub etib, 7 imkoniyatdan 5,5 ochko jamg‘ardi va birinchi o‘rin bilan keyingi bosqichga chiqdi. Bugun chorakfinal bahslari boshlanadi.

Foto: Freestyle Chess / X

O‘zbekistonlik grossmeyster Javohir Sindarov (2726) Janubiy Afrika Respublikasining Keyptaun shahrida bo‘lib o‘tayotgan Freestyle Chess Grand Slam turnirini muvaffaqiyatli boshladi.

U saralash bosqichining 1-turida jahonning birinchi raqamli shaxmatchisi Magnus Karlsenni (2840) mag‘lub etdi. Bu o‘zbekistonlik 20 yoshli shaxmatchining faoliyatida Magnus Karlsen ustidan ikkinchi g‘alabaga aylandi.

Keyingi turlarda u eronlik Parham Maksudlu (2708), amerikalik Fabiano Karuana (2795) va Hans Moke Nimanni (2725) ham mag‘lub etdi, hindistonlik Arjun Erigaisi (2775), germaniyalik Vinsent Kaymer (2776) hamda amerikalik Levon Aronyan (2729) bilan durang qayd etildi.

Natijada o‘zbekistonlik shaxmatchi 5,5 ochko bilan saralash turnirida birinchi o‘rinni egalladi va pley-off bosqichida (chorakfinalda) o‘z raqibini birinchi bo‘lib tanlash imkoniyatiga ega bo‘ldi. U turnir autsayderi Parham Maksudluni tanladi (ushbu shaxmatchi saralash bosqichida barcha bahslarda yutqazgan).