"Kam taʼminlangan oila" maʼlumotnomasi my.gov.uz orqali qanday olinadi?

«Mahalla yettiligi» oilalarni ijtimoiy qoʻllab-quvvatlash masalalarida ham qatnashadi.

Masalan, toʻrt kishidan iborat oilaning jami oylik daromadi 2,4 mln soʻm boʻlsa, har bir oila aʼzosiga 600 ming soʻmdan toʻgʻri keladi. Bu belgilangan 715 ming soʻmlik minimal koʻrsatkichdan kam.

Ammo daromadning kamligi oilaning reyestrga avtomatik ravishda kiritilishini anglatmaydi. Ariza koʻrib chiqilayotganda oila aʼzolarining mehnatga layoqati va boshqa holatlar ham hisobga olinadi. Oilaning qaysi toifaga kiritilishi shunga bogʻliq.

Oilani Ijtimoiy reyestrga kiritish uchun ariza qanday beriladi?

Agar oila Ijtimoiy reyestrga kiritilmagan boʻlsa, avval ariza topshirish kerak. Buni my.gov.uz orqali bepul amalga oshirish mumkin.

1. Ariza berish sahifasiga oʻting va portalda avtorizatsiyadan oʻting.

1. Avtomatik kiritilgan JSHSHIR va ism-sharifingizni tekshiring.

1. Viloyat, tuman va mahallani tanlang, telefon raqamini koʻrsating.

1. Maʼlumotlarni tekshiring, arizani tasdiqlang va yuboring.

Ariza bir oy ichida koʻrib chiqiladi. Qoʻshimcha hujjatlar talab qilinmaydi.

Agar portal orqali murojaat qilish imkoni boʻlmasa, «Inson» ijtimoiy xizmatlar markazi, mahalladagi ijtimoiy xodim yoki Davlat xizmatlari markaziga murojaat qilishingiz mumkin. Ular oilani Ijtimoiy reyestrga kiritish uchun ariza topshirishda yordam beradi.

Ijtimoiy reyestr boʻyicha qaror ustidan qanday shikoyat qilish mumkin?

Agar Ijtimoiy reyestr boʻyicha chiqarilgan qarordan norozi boʻlsangiz, avvalo, qarorning asosi bilan tanishing. Oilaning tarkibi, daromadlari va arizani koʻrib chiqishda hisobga olingan boshqa maʼlumotlarni tekshiring.

Oilaga berilgan toifa yoki uni reyestrdan chiqarish haqidagi qaror ustidan tuman yoki shahar hokimligi huzuridagi apellyatsiya kengashiga shikoyat qilish mumkin.

Shikoyatni «Inson» markazi, Davlat xizmatlari markazi, my.gov.uz portali yoki «Ijtimoiy karta» ilovasi orqali yuborish mumkin. Shikoyat qilish tartibi Vazirlar Mahkamasining 2026-yil 29-yanvardagi 35-son qarorida belgilangan.

Kam taʼminlangan oilalar uchun qanday imtiyozlar mavjud?

Ijtimoiy reyestrga kiritilgan oilalar yordam puli olish, ayrim davlat xizmatlari uchun chegirmalardan foydalanish va taʼlim sohasida koʻmak olishlari mumkin. Muayyan imtiyozlar oilaning toifasi va dastur shartlariga bogʻliq.

Bolalar nafaqasi va moddiy yordam

2026-yil 1-iyuldan Ijtimoiy reyestrdagi oilalarga toʻlanadigan bolalar oylik nafaqasi va moddiy yordam miqdori 7 foizga oshirilgan. Prezidentning PF-115-son Farmoniga muvofiq, quyidagi miqdorlar belgilangan:

• 386 ming soʻm - 3 yoshgacha boʻlgan eng kichik farzand uchun;

• 295 ming soʻm - 3 yoshdan 18 yoshgacha boʻlgan eng kichik farzand uchun;

• 177 ming soʻm - ikkinchi farzand uchun qoʻshimcha toʻlov;

• 118 ming soʻm - uchinchi va undan keyingi har bir farzand uchun qoʻshimcha toʻlov;

• 450 ming soʻm - oylik moddiy yordam.

Bolalar nafaqasi va moddiy yordam uchun arizani my.gov.uz orqali berish mumkin.

Davlat xizmatlariga chegirmalar

Ijtimoiy reyestrga kiritilgan oilalar ayrim davlat xizmatlari uchun toʻlovlarda chegirmalardan foydalanishi mumkin:

• 75 foiz - davlat taʼminotidagi oilalar uchun;

• 50 foiz - kambagʻal oilalar uchun.

Oila boshqa toifaga oʻtganda ham belgilangan shartlar asosida chegirmalar saqlanib qolishi mumkin. Ogʻir hayotiy vaziyat sababli reyestrga kiritilgan oilalarga ham 12 oygacha 50 foizlik chegirma nazarda tutilgan.

Bu imtiyoz barcha toʻlovlarga tatbiq etilmaydi. Jumladan, tadbirkorlik faoliyati bilan bogʻliq davlat xizmatlari uchun chegirma qoʻllanmaydi. Toʻlovni amalga oshirishdan oldin muayyan xizmatga chegirma tatbiq etilishini tekshirish lozim.

Davlat bogʻchasiga joylashtirishdagi imtiyozlar

Kam taʼminlangan oilalarning farzandlarini davlat maktabgacha taʼlim tashkilotiga joylashtirishda imtiyozli navbatdan foydalanish huquqiga ega boʻlishi mumkin. Arizani my.gov.uz orqali topshirish va imtiyozli toifani koʻrsatish mumkin. Tizim tegishli maʼlumotlarni avtomatik ravishda tekshiradi.

Imtiyozli navbat farzand tanlangan bogʻchadan darhol joy olishini kafolatlamaydi.

Kontrakt toʻlovida yordam

Ijtimoiy reyestrga kiritilgan oilalarning 14 yoshdan 30 yoshgacha boʻlgan aʼzolari «Yoshlar daftari» dasturi doirasida kunduzgi taʼlim shaklida oʻqish kontraktini toʻlash uchun yordam olishga daʼvogarlik qilishi mumkin.

Yordam miqdori kontrakt summasining 50 foizigacha, biroq 50 ta bazaviy hisoblash miqdoridan (BHM) oshmagan holda tashkil etadi. 2026-yil oktabr holatiga bu 22 million soʻmga teng.

Yordam dastur shartlariga rioya qilinganda ajratiladi. U quyidagi taʼlim shakllari va holatlariga tatbiq etilmaydi: sirtqi taʼlim, kechki taʼlim, masofaviy taʼlim, ikkinchi va undan keyingi mutaxassislikni olish, qoʻshma taʼlim dasturlari, tabaqalashtirilgan toʻlov-kontrakt asosida oʻqish. Ushbu yordam uchun arizalar iyul, avgust va sentabr oylaridan tashqari yil davomida qabul qilinadi. Arizani my.gov.uz orqali topshirish mumkin.

Koʻp beriladigan savollar

Oila Ijtimoiy reyestrga kiritilmagan boʻlsa, maʼlumotnoma olish mumkinmi?

Yoʻq. Avval oilani reyestrga kiritish uchun ariza topshirish kerak. Oila reyestrga kiritilganidan keyin maʼlumotnoma olish mumkin.

Maʼlumotnomani qancha vaqtda olish mumkin?

Maʼlumotnoma avtomatik ravishda shakllantiriladi. Oilani Ijtimoiy reyestrga kiritish haqidagi ariza esa bir oygacha boʻlgan muddatda koʻrib chiqiladi.

Maʼlumotnoma olish yoki reyestrga kiritilish uchun toʻlov bormi?

Yoʻq. my.gov.uz orqali ikkala xizmat ham bepul.

Maʼlumotnoma barcha imtiyozlarni olish huquqini beradimi?

Yoʻq. Maʼlumotnoma shaxsning Ijtimoiy reyestrga kiritilgan oilaga mansubligini tasdiqlaydi. Har bir nafaqa va imtiyozning oʻz shartlari mavjud. Shu sababli maʼlumotnoma barcha toʻlovlar va imtiyozlar avtomatik ravishda tayinlanishini anglatmaydi.

Ijtimoiy reyestr va «Temir daftar» bir xilmi?

Yoʻq. «Temir daftar» va Ijtimoiy reyestr ijtimoiy yordamga muhtoj fuqarolar va oilalarni hisobga olishning alohida tizimlari. Oilaning «Temir daftar»ga kiritilgani uning Ijtimoiy reyestrga ham kiritilganini anglatmaydi. Maʼlumotnoma olish uchun oila Ijtimoiy reyestrda boʻlishi kerak.