Oʻzbekistonlik grossmeyster Javohir Sindarov yangi FIDE Excellence Awards mukofotining «Best Chess Player» («Eng yaxshi shaxmatchi») nominatsiyasida birinchi sovrindorga aylandi. Taqdirlash marosimi Samarqandda 46-Butunjahon shaxmat olimpiadasi doirasida boʻlib oʻtdi.
FIDE 2026-yilda Excellence Awards mukofotini taʼsis etgan edi. Mukofot ikki yilda bir marta topshiriladi va olimpiya sikli davomidagi yutuqlarni hisobga oladi. Birinchi mukofot 2024-yil sentabridan 2026-yil avgustigacha boʻlgan davrni qamrab oldi.
Sindarov toʻqqiz nafar talabgordan oʻzib ketdi. Undan tashqari hamyurti Nodirbek Abdusattorov, Fabiano Karuana (AQSH), Magnus Karlsen (Norvegiya), Arjun Erigaysi (Hindiston), Alirizo Firuzjo (Fransiya), Anish Giri (Niderlandiya), Gukesh Dommaraju (Hindiston), Vinsent Keymer (Germaniya) va Rameshbabu Pragnanandha (Hindiston) ham yakuniy roʻyxatdan joy oldi.
Laureatni tanlashda shaxmatchining klassik shaxmat, rapid va blits boʻyicha natijalari, reyting dinamikasi va ikki yillik davr mobaynidagi yutuqlari inobatga olindi.
Sindarovning asosiy muvaffaqiyatlaridan biri 2025-yilda Hindistonning Goa shahrida boʻlib oʻtgan FIDE Jahon kubogidagi gʻalabasi boʻldi. 19 yoshli oʻzbekistonlik shaxmatchi turnir tarixidagi eng yosh gʻolibga aylandi va Daʼvogarlar turniriga yoʻllanmani qoʻlga kiritdi.
2026-yil bahorida Sindarov Kiprdagi Daʼvogarlar turnirida ham gʻolib chiqdi va musobaqa tugashiga bir tur qolganda birinchi oʻrinni naqd qildi. U 14 imkoniyatdan 10 ochko toʻplagan holda turnirni magʻlubiyatsiz yakunladi - bu Daʼvogarlar turnirining zamonaviy formati uchun rekord natijadir. Shundan soʻng oʻzbekistonlik shaxmatchi jahon reytingida toʻrtinchi oʻringa koʻtarildi.
Daʼvogarlar turniridagi gʻalaba Sindarovga amaldagi jahon chempioni Gukesh Dommarajuga qarshi jahon shaxmat toji uchun oʻyin oʻtkazish huquqini berdi. Ushbu bahs 25-noyabrdan 15-dekabrgacha Jeneva (Shveysariya) shahrida oʻtkaziladi.
