O‘shda Navoiy shohko‘chasi ochildi

Qirg‘izistonning O‘sh shahrida Alisher Navoiy nomi bilan atalgan shohko‘cha va shoir haykalining tantanali ochilish marosimi o‘tkazildi. Bu haqda “Dunyo” AA xabar qildi.

Marosimda qatnashish uchun O‘zbekiston madaniyat vaziri Ozodbek Nazarbekov boshchiligida Andijon viloyati hokimiyati, Yozuvchilar uyushmasi, Alisher Navoiy nomidagi O‘zbek tili va adabiyoti universiteti vakillari hamda O‘zbekistonning Qirg‘izistondagi elchisi Saidikrom Niyozxo‘jayev O‘sh shahriga amaliy tashrif bilan bordi.

O‘zbekiston delegatsiyasini qirg‘iz–o‘zbek davlat chegarasidagi “Dostuk” chegara-o‘tish punktida Qirg‘iziston madaniyat, axborot va yoshlar siyosati vaziri o‘rinbosari Askarali Madaminov, prezidentning O‘sh viloyatidagi vakolatli vakilining birinchi o‘rinbosari Ilyaz Tashbayev, O‘sh shahar meri Jyenishbek Toktorbayev hamda boshqa rasmiy shaxslar tantanali ravishda kutib oldi.

Ochilish marosimida Qirg‘iziston prezidentining O‘sh viloyatidagi vakolatli vakili Amankan Kenjyebayev boshchiligida davlat va jamoat tashkilotlari vakillari, O‘zbekiston delegatsiyasi va OAV xodimlari ishtirok etdi. Tadbir Navoiy haykalini ochish va uning poyiga gulchambarlar qo‘yish marosimi bilan boshlandi. Shundan so‘ng o‘zbek va qirg‘iz san’atkorlari ishtirokida Navoiy ijodini aks ettiruvchi sahna ko‘rinishlari va uning g‘azallariga bastalangan qo‘shiqlardan iborat konsert dasturi taqdim etildi.

Marosimda so‘zga chiqqanlar Alisher Navoiyning ma’naviy merosi o‘zbek va qirg‘iz xalqlarini birlashtiruvchi muhim qadriyat ekani, O‘sh shahrida Navoiy nomini abadiylashtirish ishlari ikki mamlakat o‘rtasidagi madaniy hamkorlikning yorqin timsoli ekanini ta’kidladilar.

Shahar meri ma’lum qilishicha, O‘sh shahrida Alisher Navoiy nomidagi istirohat bog‘i 1968 yilda barpo etilgan va buyuk shoirning shahardagi birinchi haykali ham o‘sha yil o‘rnatilgan. 1991 yilda bog‘ atrofidagi ko‘chaga Navoiy nomi berilgan bo‘lib, so‘nggi yillarda ta’mirlash-obodonlashtirish ishlari natijasida u shohko‘cha maqomiga o‘zgartirilgan.

Tadbir doirasida o‘zbek–qirg‘iz delegatsiyalari o‘rtasida hamkorlik masalalari ham muhokama qilindi. Shuningdek, O‘zbekiston prezidenti farmoniga muvofiq, O‘sh shahar meri Jyenishbek Toktorbayev “Do‘stlik” ordeni bilan taqdirlanib, mukofotni Ozodbek Nazarbekov tantanali ravishda topshirdi.