Erkin iqtisodiy zonalarga mashhur brendlar jalb qilinadi, yangi maxsus rejim joriy etiladi

Prezidentning qayd etishicha, ushbu choralar kelgusi besh yilda 180 mlrd dollar xorijiy investitsiya hisobiga 1 mln yuqori daromadli ish o‘rni yaratishga xizmat qilishi kutilmoqda. Shuningdek, har bir kelishuvni loyihaga aylantirish, sarmoyalarni qisqa fursatda jalb qilish va samaradorligiga mas’ul bo‘ladigan, faqat investitsiya bilan ishlaydigan alohida yangi tizim yaratilishi belgilandi. Mahalliy sanoat va kooperatsiyani rivojlantirish bo‘yicha ham xuddi shunday tizimni yo‘lga qo‘yish maqsadga muvofiq ekani aytildi.

Davlat rahbari iqtisodiyotni raqobatdosh qilish, investitsiyalar samaradorligini oshirish va sanoat tarmoqlarini texnologik transformatsiya qilish yangi yondashuvlarni talab etishini ta’kidlab, shu munosabat bilan Iqtisodiyot va moliya, Investitsiyalar, sanoat va savdo vazirliklari faoliyati tubdan qayta ko‘rib chiqilishini ma’lum qildi.

Shuningdek, yangi texnologik bosqichga o‘tish va qo‘shilgan qiymat zanjirini kengaytirish maqsadida sanoatni rivojlantirish dasturi boshlanishi aytildi. Unga ko‘ra, kelgusi besh yilda sanoatda qo‘shilgan qiymatni hozirgi 36,5 mlrd dollardan kamida 60 mlrd dollarga yetkazish, yuqori va o‘rtadan yuqori texnologiyali tarmoqlarda mahsulot hajmini 2,5 barobar oshirish marra sifatida belgilanmoqda.

Bu maqsadlarga tayyorgarlik doirasida 2026 yilda 52 mlrd dollarlik 782 ta yangi sanoat va infratuzilma loyihasiga start berilishi, kelgusi yilning o‘zida esa 14 mlrd dollarlik 228 ta yirik yangi quvvatlar ishga tushirilishi qayd etildi.

Misol sifatida Navoiydagi oltin konlarida ma’dan qazib olish bo‘yicha 320 mln dollarlik loyiha ishga tushirilib, qo‘shimcha 2 mln tonna ma’dan qayta ishlanishi aytildi. Shuningdek, «Muruntov» konini o‘zlashtirishning navbatdagi bosqichi hamda kumush konlari bo‘yicha 2,3 mlrd dollarlik yirik loyihalar amalga oshirilishi belgilandi.

Natijada yiliga 18 mln tonna ma’danni qayta ishlash quvvati barpo etilishi va 2030 yilgacha oltin ishlab chiqarish hajmi 175 tonnaga yetkazilishi ko‘zda tutilmoqda.