Maktabgacha va maktab ta’limi: 2025 yilda 59 ta yangi maktab ishga tushirildi

Brifingda qayd etilishicha, joriy yilda 59 ta yangi maktab faoliyati yo‘lga qo‘yilib, mamlakatdagi maktablar soni 10 193 taga, o‘quvchilar soni esa 6,5 mln nafarga yetkazilgan.

Shuningdek, 2024–2025 o‘quv yili yakunlariga ko‘ra 433 503 nafar 11-sinf hamda 633 952 nafar 9-sinf bitiruvchisiga tegishli shahodatnomalar berilgan.

Maktabgacha ta’lim yo‘nalishida bolalarni qamrab olish ko‘rsatkichi 78 foizga, 6 yoshli bolalar qamrovi esa 98 foizga yetkazilgani ta’kidlandi.

Infratuzilmani yangilash doirasida maktablarning 43 tasida yangi qurilish, 371 tasida rekonstruksiya, 88 tasida mukammal ta’mirlash ishlari bajarilgan. Maktabgacha ta’lim tashkilotlarining esa 103 tasida yangi qurilish, 191 tasida rekonstruksiya, 36 tasida mukammal ta’mirlash ishlari amalga oshirilgan.

Natijada maktablarda 142 mingga yaqin qo‘shimcha o‘quv o‘rni yaratilgan, shu bilan birga 92 ming 400 o‘rinli mavjud binolar mukammal ta’mirlangan.

O‘quvchilarni nufuzli oliy ta’lim muassasalariga maqsadli tayyorlashga qaratilgan «Prezident iqtidorli farzandlari» milliy dasturi ishga tushirilib, dasturga 2 642 ta hujjat qabul qilingan.

Ta’lim tashkilotlari xodimlarini moddiy qo‘llab-quvvatlash maqsadida esa joriy yilda maktab direktori bazaviy tarif stavkasi 20 foizga, direktor o‘rinbosari bazaviy tarif stavkasi 15 foizga oshirilgan.