Toshkentda pulli to‘xtab turish joylarida rezidentlar uchun ruxsatnomalar joriy etilmoqda

2026 yil 1 fevraldan Toshkent shahrida pulli yo‘lbo‘yi avtoturargohlariga yaqin hududlarda istiqomat qiluvchi fuqarolar uchun rezident avtoturargoh ruxsatnomalari amaliyoti yo‘lga qo‘yiladi. Yangicha tartibga ko‘ra, rezidentlar tungi vaqtda bepul to‘xtab turish imkoniyatiga ega bo‘ladi, kunduzi esa imtiyozli shartlarda foydalanadi.

Qarorga muvofiq, rezident avtoturargoh ruxsatnomasi — “elektron hukumat” tizimidagi rezident ruxsatnomalari reyestriga kiritiladigan elektron yozuv bo‘lib, u belgilangan pulli avtoturargoh joylarida avtomobilni joylashtirish huquqini beradi. Rezidentlar qatoriga pulli avtoturargohlar joylashgan hududlarda yoki ularga tutash mahallalardagi uy-joylarda yashovchi (mulk huquqiga ega yoki mulk huquqida ulushi bor) transport vositasi foydalanuvchilari kiritiladi.

Tartibga ko‘ra, ruxsatnomada ko‘rsatilgan avtomobilni soat 20:00 dan 08:00 gacha bepul joylashtirish mumkin, qolgan vaqtlarda esa amaldagi tariflar asosida to‘lov undiriladi.

Shuningdek:

ruxsatnoma 1 yil muddatga beriladi;
yillik rezident to‘lovi 1 BHM (hozirda 412 ming so‘m) miqdorida belgilangan;
har bir turarjoy (manzil) uchun ko‘pi bilan 2 ta rezident ruxsatnomasini reyestrga kiritish mumkin;
arizani Yagona interaktiv davlat xizmatlari portali orqali topshirish rejalashtirilgan.

Yangi tartib 2026 yil 1 fevraldan kuchga kiradi.

Tayyorlagan: Отабек Матназаров

#pulli avtoturargoh