Zelenskiy Tramp bilan navbatdagi uchrashuvini anons qildi

Volodimir Zelenskiy «yaqin vaqtlar ichida» Donald Tramp bilan uchrashishni rejalashtirayotganini aytdi. Ukraina prezidentining so‘zlariga ko‘ra, Ukraina Milliy xavfsizlik va mudofaa kengashi kotibi Rustem Umerov unga «Amerika tomoni bilan navbatdagi kontaktlari» haqida hisobot bergan. «Bir kunimizni ham boy bermaymiz. Yaqin kunlarda eng oliy darajada – prezident Tramp bilan uchrashishga kelishib oldik. Yangi yilgacha ko‘p narsa hal bo‘lishi mumkin», – deb yozdi Zelenskiy o‘zining ijtimoiy tarmoqlardagi sahifasida. Uchrashuv qaysi kunga rejalashtirilayotganiga aniqlik kiritilmagan.

Kyiv Post nashrining diplomatik manbalarga tayanib yozishicha, Zelenskiy Trampning Floridadagi Mar-a-Lagodagi xususiy qarorgohiga borishi mumkin. Nashr suhbatdoshlaridan birining so‘zlariga ko‘ra, agar hammasi reja bo‘yicha ketsa, bu tashrif 28 dekabr, yakshanba kuni amalga oshadi. Xuddi shu sana va joy Axios nashri jurnalisti Barak Ravid tomonidan ham keltirilgan.

Bir kun avval Zelenskiy Trampning muzokarachilari Stiv Uitkoff va Jared Kushner bilan «juda yaxshi suhbat» o‘tkazganini aytgandi. «Birgalikdagi natija va uzoq muddatli tinchlik uchun ish berishi mumkin bo‘lgan yaxshi g‘oyalar bor», – deya qo‘shimcha qilgan u.

Bu safargisi uning Tramp bilan uchrashish uchun AQShga qilayotgan to‘rtinchi tashrifi bo‘ladi. Ularning 2025 yil 28 fevralda Oval kabinetdagi birinchi uchrashuvi mojaro bilan yakunlangan, unda Amerika prezidenti Zelenskiyni urushni tugatishni istamaslikda, vitse-prezident Jyey Di Vens esa AQShga hurmat ko‘rsatmaslikda ayblagandi.

Zelenskiy ikkinchi marta Tramp bilan avgust oyida Yevropa yetakchilari ishtirokidagi davrada uchrashgandi – bu uchrashuv AQSh prezidentining Alyaksada Vladimir Putin bilan o‘tkazgan muzokaralaridan bir necha kundan keyin bo‘lib o‘tgandi. Bu galgi tashrif ancha do‘stona ruhda kechgandi.

Uchinchi va oxirgi bor Zelenskiy AQShga Tramp bilan uchrashish uchun 2025 yil 17 oktyabrida borgandi. O‘shanda tomonlar Ukrainaga uzoq masofaga harakatlanuvchi «Tomahavk» raketalarini yetkazish masalasini muhokama qilishi kutilgandi, ammo Zelenskiy uchrashuvdan chiqqach, bu mavzuda bayonot bermaslikka qaror qilinganini aytgan hamda «AQSh eskalatsiyani xohlamayotgani»ni qo‘shimcha qilgandi.

Zelenskiyning Tramp bilan uchrashuvi arafasida tinchlik rejasi bo‘yicha bir nechta asosiy masalalar ochiq qolmoqda, ular orasida Zaporijjya atom elektr stansiyasi boshqaruvi masalasi ham bor. Zelenskiy 24 dekabr kuni jurnalistlar bilan uchrashuv vaqtida bu borada murosaga kelinmayotganini aytgandi. Vashington stansiyadan Ukraina, AQSh va Rossiya birgalikda foydalanishini taklif qilmoqda. Ukraina taklifi boshqacha: Zaporijjya atom elektr stansiyasi AQSh va Ukrainani o‘z ichiga olgan qo‘shma korxona bo‘ladi – 50 ga 50.

Shu kunlarda yana bir ehtimoliy variant paydo bo‘ldi. «Kommersant» gazetasi muxbiri Andrey Kolesnikovning ma’lum qilishicha, Zaporijjya AES mavzusi 24 dekabr kuni Vladimir Putinning yirik biznes vakillari bilan yopiq uchrashuvida ko‘tarilgan – va u yerda stansiyani Ukraina ishtirokisiz Amerika va Rossiya birgalikda boshqarishi masalasi muhokama qilingan. Kolesnikovning ta’kidlashicha, AQSh vakillari Zaporijjya atom elektr stansiyasida «mayning bilan shug‘ullanishga qiziqish bildirgan».

Xuddi shu uchrashuvda Putin Ukraina hududlarini bo‘lish talabini qo‘yishda davom etgan. «Gap „Donbass nash“ iborasi haqida ketmoqda. „Kramatorsk-Konstantinovsk-Slovyansk tuguni kimga tegishliligi masalasi muhokama qilinmasligi“ aytilgan. Ammo Rossiya qisman hududlar almashinuvini ham istisno qilmaydi», – deb yozadi Kolesnikov.

Zelenskiyning tinchlik rejasida esa «qayerda turgan bo‘lsak, o‘sha yerda qolamiz» (ya’ni hududlarni hozirgi front chizig‘i bo‘ylab bo‘lish) yoki ikki tomon ham qo‘shinlarni front chizig‘idan olib chiqib ketishi va u yerda erkin iqtisodiy zona yaratish variantlari taklif qilingan.