Kosovo saylovlari: hukmron partiya g‘alaba qozondi

Kosovoda hukmron “O‘zligini belgilash” partiyasi mamlakat bosh vaziri Albin Kurti rahbarligida navbatdan tashqari parlament saylovlarida ishonchli g‘alaba qozondi. Prishtinadagi Markaziy saylov komissiyasi yakshanba, 28 dekabr kuni, deyarli barcha saylov uchastkalaridan ovozlar sanab chiqilganidan so‘ng ma’lum qilishicha, “O‘zligini belgilash” 49,8 foiz ovoz to‘plagan.

Shu tariqa, partiya yangi chaqiriq parlamentdagi o‘rinlarning qariyb yarmiga ega bo‘ladi va bir qator etnik ozchilik vakillari bilan birga hukumatda ko‘pchilikni ta’minlay oladi, deb prognoz qilmoqda koha.net portali.

Dpa agentligi xabar berishicha, hukmron partiya tarafdorlari g‘alabani nishonlash uchun Prishtina ko‘chalarida avtokortej bilan aylanib, signal chalgan. Shahar ustida feyyerverklar ham uchirilgan. Kurtining o‘zi ovoz berishni “halol, demokratik va erkin” deb atadi. Yangi mandat munosabati bilan hukumat oldida ko‘p vazifalar turganini, “yaxshi ishni davom ettirish zarur” ekanini qo‘shimcha qildi.

Muxolifatdagi “Kosovo Demokratik partiyasi” va “Kosovo Demokratik ligasi” mos ravishda 21 foiz va 13,6 foiz natija bilan ikkinchi va uchinchi o‘rinlarni egallagan. To‘rtinchi o‘rinda — sobiq bosh vazir Ramush Xaradinayga tegishli konservativ “Kosovo kelajagi uchun alyans” bo‘lib, u 7,6 foiz ovoz olgan.

120 o‘rinli parlamentda serb ozchiligiga 10 ta o‘rin ajratilgan, boshqa etnik guruhlarga yana 10 tadan o‘rin to‘g‘ri keladi.

Kosovo parlamentiga joriy saylovlar — yil boshidan buyon ikkinchisi. 9 fevral kuni bo‘lib o‘tgan muntazam saylovlardan so‘ng 50 yoshli Kurti muxolifatdagi hech bir partiya bilan koalitsiya tuzish bo‘yicha kelisholmagan va mutlaq ko‘pchilikni ta’minlay olmagan edi.

Albin Kurti hukumati Kosovoning asosan shimolida yashaydigan serb ozchiligiga nisbatan qat’iy yo‘nalishni ushlab kelmoqda — mintaqada davlat nazoratini kengaytirmoqda. Xususan, serb valutasi (dinor)dan foydalanish hamda Belgradning ijtimoiy to‘lovlariga bog‘liq bo‘lgan kosovolik serblar uchun Serbiyadan pul o‘tkazmalarini amalga oshirish taqiqlangan. Bu Yevropa Ittifoqi va AQShda norozilik uyg‘otgan, shuningdek Prishtina bilan Belgrad o‘rtasidagi aloqalarning yanada keskinlashishiga olib kelgan.

YeI Kosovodagi bir qator loyihalarni moliyalashtirishni to‘xtatishga qaror qildi va ularni qayta tiklash uchun shartlar qo‘ydi — Prishtinadan mamlakat shimolidagi keskinlikni pasaytirish bo‘yicha qadamlar talab qilingan. AQSh ham USAID (AQSh Xalqaro taraqqiyot agentligi) orqali Kosovodagi turli loyihalarni moliyalashtirishni 90 kunga muzlatgan.

Dekabr oyi o‘rtasida Kosovo rasman Yevropa Ittifoqiga a’zo bo‘lish uchun ariza topshirdi. Serbiya esa bunday arizani 2009 yilda bergan. OAV ma’lumotlariga ko‘ra, G‘arb har ikki davlatga ham yevrointegratsiya istiqbollari ularning o‘zaro munosabatlarni tartibga solishdagi yutuqlariga bevosita bog‘liq ekanini anglatgan. YeIning besh davlati — Ispaniya, Kipr, Gretsiya, Slovakiya va Ruminiya hali ham, Serbiya va yana bir qator davlatlar, jumladan Rossiya kabi, Kosovoning Serbiyadan mustaqilligini tan olmaydi.