RF sudi Telegram va WhatsApp’ni cheklashga qarshi da’voni rad etdi

Taganskiy tuman sudi Rossiyada Telegram va WhatsApp ishiga qo‘yilgan cheklovlarni noqonuniy deb topish talab qilingan da’vo bo‘yicha ish yuritishni tugatdi. Bu haqda Moskva umumiy yurisdiksiya sudlarining rasmiy Telegram-kanalida dushanba kuni, 29 dekabrda xabar qilindi.

Qarorni sudya Margarita Kuningas chiqardi. Uni bu lavozimga Vladimir Putin 2025 yil oktyabrda tayinlagan.

Kuningas ishni ko‘rib chiqishga bir haftadan kam vaqt sarflagan. Da’vo 24 dekabrda ish yuritishga qabul qilingan. Uni Roskomnadzor va RF Raqamli rivojlanish vazirligiga qarshi 105 nafar rossiyalikdan iborat guruh, Kaluga viloyatidan bo‘lgan yosh faol Konstantin Larionov boshchiligida bergan.

“Da’vogar Telegram va WhatsApp axborot resurslari egalari huquqlarini himoya qilish uchun da’vo kiritishga vakolatli ekanini tasdiqlovchi dalillarni taqdim etmadi”, — deb sudya ish yuritishni tugatish qarorini asoslagan.

Sudda WhatsApp AQShning Meta Platforms korporatsiyasiga tegishli ekani eslatildi, RF hokimiyati Meta’ni “ekstremistik” deb topgan va taqiqlagan. Qaror ustidan Moskva shahar sudiga 13 kun ichida shikoyat qilinishi mumkin.

Avgust oyidan buyon Rossiyada WhatsApp va Telegram ishi faol ravishda bloklanmoqda. O‘shandayoq RFdagi aksariyat foydalanuvchilar uchun ushbu servislar orqali qo‘ng‘iroqlar amalga oshmay qolgan.

28 noyabrda Roskomnadzor WhatsApp Rossiya qonunlari talablarini bajarmasa, ya’ni huquqni muhofaza qiluvchi organlar bilan hamkorlik qilmasa, u to‘liq bloklanishi mumkinligi haqida ogohlantirgan.

22 dekabrdan boshlab RFdagi foydalanuvchilar WhatsApp bilan bog‘liq muammolar kuchayganidan shikoyat qila boshlagan. RBK manbasi ma’lumotiga ko‘ra, Roskomnadzor uning ishlash tezligini 70–80 foizga sekinlatgan.