Strategiya loyihasida ekotizimlarni saqlash va tabiiy resurslardan barqaror foydalanish yo‘nalishida o‘rmonlar maydonini oshirish asosiy vazifalardan biri sifatida qayd etilgan. Xususan, yerlarni eroziyadan asrash, melioratsiya obektlarini qum ko‘chishidan himoya qilish uchun ihota daraxtzorlarini ko‘paytirish, shu bilan birga o‘rmon bilan qoplangan umumiy maydonni kengaytirish rejalashtirilgan.
Loyihada keltirilgan maqsadli ko‘rsatkichlar quyidagicha:
- yerlarni eroziyadan va melioratsiya obektlarini qum ko‘chishidan saqlash uchun ihota daraxtzorlarini 30 055 gektarga yetkazish;
- respublikada o‘rmon bilan qoplangan maydonlarni 6,1 million gektarga yetkazish;
- daraxt va butalarni ko‘paytirish uchun har yili 1500 tonna urug‘ tayyorlashni ta’minlash.
Shu bilan birga, loyihada Orol dengizi qurishi natijasida yuzaga kelgan ekologik muammolar ta’sirini yumshatish va Orolbo‘yi mintaqasida yashash sharoitini yaxshilashga qaratilgan chora-tadbirlar alohida blok sifatida ko‘rsatilgan. Maqsad — mintaqada ko‘kalamzorlashtirish ishlarini kengaytirish orqali qum-tuz ko‘chishini kamaytirish va ekotizim barqarorligini oshirish.
Orolbo‘yi bo‘yicha rejalashtirilayotgan ko‘rsatkichlar:
- Orolbo‘yi mintaqasida 600 ming gektar yashil maydonlarni barpo etish;
- Orolbo‘yi mintaqasidagi o‘rmonzorlarni 2,3 million gektarga yetkazish;
- Orol dengizi hududida yashil maydonlarning umumiy hajmini 2,6 million gektarga yoki hududning 80 foiziga yetkazish;
- “Yashil iqlim” va Global ekologik jamg‘armalarning bioxilma-xillik, iqlim o‘zgarishi va tuproq yemirilishining oldini olishga qaratilgan dasturlari asosida 30 mln dollar qiymatidagi loyihalarni amalga oshirish.
Loyihaga ko‘ra, o‘rmonlarni kengaytirish va Orolbo‘yini ko‘kalamzorlashtirish bo‘yicha belgilangan choralar yer degradatsiyasi xavfini pasaytirish, chang-tuz bo‘ronlari ta’sirini yumshatish hamda mintaqaning ekologik barqarorligini mustahkamlashga xizmat qilishi kutilmoqda.
