Boltiq dengizida Litva va Latviya o‘rtasida optik kabel shikastlangan. Bu haqda dushanba, 5 yanvar kuni mahalliy LRT radiosi efirida Inqirozlarni boshqarish milliy markazi (IBMM) rahbari Vilmantas Vitkauskas xabar qildi. Uning aytishicha, shikastlanish Latviyaning hududiy suvlarida, Liyepaya portidan bir necha kilometr uzoqlikda sodir bo‘lgan va iste’molchilar uchun hech qanday uzilishlarga olib kelmaydi.
“Eng muhimi — muvozanat ta’minlanganini ko‘rish. Operatorlarimiz bizga iste’molchilar uchun hech qanday muammo yo‘qligini aytdi: internet-trafik oqimlari boshqa nuqtalar orqali qayta taqsimlandi — quruqlikdan Polsha orqali, shuningdek Shvetsiya bilan to‘g‘ridan to‘g‘ri kabel ham bor. Bizda muqobil yo‘llar bor va iste’molchilar hech qanday uzilishni sezmaydi”, — dedi IBMM rahbari.
Vitkauskasga ko‘ra, shikastlangan optik kabel Litva va Latviyaning muhim infratuzilmasi bir qismi bo‘lib, iste’molchilarni Skandinaviya mamlakatlari bilan internet aloqasi bilan ta’minlaydi. Shvetsiya pensiya jamg‘armalari tomonidan boshqariladigan xususiy Polhem Infra kompaniyasiga tegishli kabelning shikastlangani IBMM tomonidan 2 yanvar kuni mahalliy vaqt bilan soat 23:00 atrofida qayd etilgan. Latviya politsiyasi matbuot xizmati LETA agentligiga ma’lum qilishicha, shikastlanish haqidagi axborot Litvadan kelib tushgan.
Latviya xizmatlari aybdorni aniqlash va ma’lumot uzatishni tiklash uchun kabelni ta’mirlash bo‘yicha choralar ko‘rgan. “Biz bu ma’lumotni latviyalik hamkasblarimizga uzatdik, hozir ular tergov o‘tkazyapti: ehtimoliy qoidabuzarni aniqlayapti, muayyan kemaning egalari va ekipaji bilan muzokaralar olib boryapti. Tergov natijalarini kutamiz, uning tez yakunlanishiga umid qilamiz”, — dedi IBMM rahbari. LRT qayd etishicha, u Latviya hokimiyati olib borayotgan tergovga zarar yetkazmaslik uchun batafsil ma’lumotlarni oshkor qilmagan.
LRT radiosi Latviya bosh vaziri Evika Silinyaga tayanib xabar qilishicha, Liyepaya porti yaqinidagi kabel shikastlanishi yuzasidan Latviya Jinoyat qonuni 187-moddasi 1-qismi bo‘yicha jinoiy ish qo‘zg‘atilgan — umumiy foydalanishdagi elektron aloqa tarmog‘i simini yoki uskunalarini qasddan yo‘q qilish yoki shikastlash holati sifatida.
Latviya politsiyasi aniqlashtirishicha, shikastlanishga sababchi bo‘lishi mumkin bo‘lgan aybdor — nomi keltirilmagan kema. Qirg‘oq qo‘riqlash xizmati tahlil qilgan ma’lumotlarga ko‘ra, kema avval faol bo‘lmagan kabel ustidan o‘tgan, keyin esa kursini faol va keyinchalik shikastlangan kabel tomon o‘zgartirgan. Kema yoki uning ekipaji ushlangani haqida xabar berilmagan, ammo ekipaj politsiya bilan hamkorlik qilayotgani aytiladi.
