Ishinger: Rossiya yevropaliklar bilan emas, AQSh bilan muzokaraga qiziqyapti

Yevropaliklarning Rossiya hukumati bilan to‘g‘ridan to‘g‘ri muzokara olib borishi hozirgi paytda ma’nosiz, deb hisoblaydi Volfgang Ishinger. U 2026 yilda forum vasiylik kengashi bilan kelishilgan holda Myunxen xavfsizlik konferensiyasi (MSC) raisi vazifasini vaqtincha bajarmoqda. Ishinger Reuters agentligiga bergan va juma kuni, 9 yanvarda e’lon qilingan televizion intervyusida tushuntirishicha, Rossiyaning yuqori lavozimli siyosatchilari bir necha bor yevropaliklar ular uchun “AQShning shunchaki vassallari” ekanini anglatgan va, ehtimol, Moskva faqat AQSh bilan muzokaradan manfaatdor.

Uning aytishicha, shu sababli u 2026 yil 13–15 fevral kunlari bo‘lib o‘tadigan Myunxen xavfsizlik konferensiyasiga Rossiya hukumati vakillarini taklif qilmagan. Ishinger ta’kidlashicha, ular baribir kelmasdi va konferensiya ishtirokchilarining “90 foizi tomonidan qarsak emas, balki qarshi pozitsiya bilan kutib olingan” bo‘lar edi. “Afsus, ammo hozirgi paytda Rossiya hukumati vakilining konferensiyada bo‘lishi unchalik ma’noga ega emas”, — dedi u.

Ishinger Fransiya prezidenti Emmanuel Makronning Kreml rahbari Vladimir Putin bilan to‘g‘ridan to‘g‘ri muzokara o‘tkazish taklifiga ham shubha bilan qarashini Reuters’ga ma’lum qildi.

Shu bilan birga, Volfgang Ishinger kelajakda Germaniya yoki yevropaliklar bilan Rossiya tomoni o‘rtasida mazmunli muzokaralar qaytadan imkoniyatga aylanishiga umid bildirdi. Bu, uning fikricha, Rossiya hukumatini Myunxen xavfsizlik konferensiyasiga yana taklif qilishga yo‘l ochishi mumkin. “Ammo, afsuski, hozir biz hali bu bosqichda emasmiz”, — dedi u. Ishinger tushuntirishicha, u bu yil ham konferensiya uchun “jiddiy intellektual, siyosiy yoki harbiy tajriba”ga ega bo‘lgan, biroq “klassik muxoliflar” qatoriga kirmaydigan rossiyalik vakillarni topishga juda uringan, ammo bundaylarni topa olmagan.

Ayni vaqtda MSC rahbari vazifasini vaqtincha bajarayotgan Ishinger Myunxendagi forumga Eron tashqi ishlar vaziri Abbos Arag‘chi taklif qilinganini aytdi, biroq uning ishtirok etishi hali tasdiqlanmagan.

Volfgang Ishinger fikricha, Ukrainada deyarli to‘rt yildan beri davom etayotgan Rossiya urushi fonida Germaniya hukumati o‘zining sharqiy qo‘shnisi — Polshaga qo‘shimcha qurol-yarog‘ni topshirishi shart. Uning ta’kidlashicha, YeI va NATOdagi bu hamkor hozir “deyarli front davlati”ga aylangan va shu bilan o‘tgan asrning 90-yillari boshida — “sovuq urush” tugagunga qadar Germaniya bajargan rolga o‘xshash vazifani o‘tamoqda.

“Biz Polshadagi do‘stlarimizga mudofaa qobiliyatini mustahkamlash uchun bularning barchasini tekin bersak bo‘ladi”, — dedi Ishinger. U misol sifatida “masalan, suvosti kemasi, fregat yoki ehtimol qandaydir harbiy uskuna”ni tilga oldi. Uning fikricha, bunday siyosiy ishora Germaniya hukumati uchun “pul talab qiladi”, ammo “siyosiy aql nuqtai nazaridan nihoyatda yaxshi investitsiya” bo‘ladi.

2026 yilgi Myunxen xavfsizlik konferensiyasida o‘nlab davlat va hukumat rahbarlari, shuningdek tashqi ishlar va mudofaa vazirlari ishtirok etishi kutilmoqda. Konferensiyaning yangi raisi — NATO sobiq bosh kotibi Yyens Stoltenberg. Biroq u Norvegiya Moliya vazirligi rahbarligiga qaytgani sabab, joriy yilda forumga Volfgang Ishinger rahbarlik qiladi. Ishinger MSC'ga 2008–2022 yillarda raislik qilgan.