Venesuela va AQSh diplomatik munosabatlarni tiklamoqchi

Prezident Nikolas Maduro AQSh tomonidan o‘g‘irlab ketilganiga bir hafta bo‘lmasdan, Venesuela rasmiylari Qo‘shma Shtatlar bilan qariyb 7 yildan beri uzilib qolgan diplomatik aloqalarni tiklash va Vashingtondagi elchixona faoliyatini qayta yo‘lga qo‘yish masalasini ko‘rib chiqmoqda. Bu haqda Venesuela prezidenti vazifasini bajaruvchi Delsi Rodriges ma’lum qildi.

Delsi Rodriges / Foto: New York Times

Rodrigesning bayonotiga ko‘ra, Venesuela va AQSh hukumatlari “ikkala mamlakatdagi diplomatik missiyalar faoliyatini qayta yo‘lga qo‘yish maqsadida, sinov tariqasidagi diplomatik jarayonlarni boshlash”ga qaror qilgan.

AQSh Davlat departamentining tasdiqlashicha, Amerika diplomatlari 9 yanvar kuni elchixona faoliyatini tiklash “ehtimoliga baho berish uchun” Venesuela poytaxti Karakasga borgan.

New York Times'ning yozishicha, ikki tomon ham dastlabki qadamlar “tajriba-sinov tariqasida” ekanini aytmoqda. Ayni paytda munosabatlar kun sayin o‘zgarishga uchrayapti.

Delsi Rodrigesga ko‘ra, diplomatik aloqalarni tiklash imkoniyatini o‘rganishdan maqsad – “agressiya va respublika prezidenti hamda birinchi xonimining o‘g‘irlab ketilishi bilan bog‘liq oqibatlarni ko‘rib chiqish, shu bilan birga, o‘zaro manfaatli kun tartibini ilgari surish”dan iborat.

AQSh prezidenti Donald Tramp esa juma kuni Amerika neft kompaniyalari rahbarlarini Oq uyga yig‘ib, ulardan Venesueladagi neft konlariga investitsiya kiritishni so‘radi.

Tayyorlagan: Комрон Чегабоев

#AQSh #Venesuela #Delsi Rodrigez

2026 yil 3 yanvar kuni soat 02:00 - 04:30 oralig‘ida AQSh kuchlari Venesuela hududida maxsus amaliyot o‘tkazib, mamlakat prezidenti Nikolas Maduro va uning rafiqasini o‘g‘irlab ketdi.