Ispaniya politsiyasi 10 tonna kokain yuklangan kemani qo‘lga oldi

12 yanvar kuni Ispaniya politsiyasi va dengiz kuchlari ochiq dengiz tarixidagi eng yirik kokain musodarasini amalga oshirdi. 10 tonna giyohvand modda Braziliyadan Yevropaga yo‘l olgan kemada aniqlangan. Kamerun bayrog‘i ostidagi kemada 294 ta qoplardagi kokain tuz yuklari orasiga yashirilgan bo‘lgan.

Reyddan so‘ng kema yoqilg‘isiz deyarli 12 soat davomida dengizda qotib qoldi va Ispaniyaning dengiz qutqaruv xizmati uni Kanar orollariga sudrab olib bordi.

Politsiya tekshiruv Janubiy Amerikadan Yevropaga katta miqdorda kokain eksport qilish bilan shug‘ullanganlikda gumon qilinayotgan ko‘pmillatli tashkilotni nishonga olganini bildirdi.

🚩Interceptado en aguas del #Atlántico un buque mercante que ocultaba casi 10 toneladas de #cocaína entre un cargamento de sal

👉Se trata de la mayor aprehensión de cocaína en alta mar realizada por @policia ⛵️

👮‍♂️El #GEO abordó el buque con destino a #Europa procedente de… pic.twitter.com/XOVYPFwlds

— Policía Nacional (@policia) January 12, 2026

Politsiya kadrlarida ular tuz ostidan kokainni belkurak va qo‘llari bilan kavlab chiqarayotgani, so‘ngra bog‘lamalarni piyerga tashiyotgani ko‘rinadi.

Bu miqdordagi giyohvand moddaning taxminiy bozor qiymati — 400 million yevroga baholanmoqda. Bundan tashqari, bortda o‘qotar qurol va o‘q-dorilar ham topildi. Ekipajning 13 nafar a’zosi hibsga olindi.

«White Tide» (Oq to‘lqin) deb nomlangan xalqaro operatsiyada Ispaniyaning politsiyasidan tashqari, Dengiz tahlili va operatsiyalari markazi, AQShning Giyohvand moddalarga qarshi kurash boshqarmasi, Buyuk Britaniyaning Milliy jinoyatchilik agentligi, Braziliya Federal politsiyasi, Ispaniyaning razvedka markazi hamda Fransiya va Portugaliya rasmiylari ishtirok etdi.

Dushanbadagi operatsiyani politsiya xalqaro narkotik savdosi tarmoqlariga berilgan tarixiy zarba deb atadi.

Ispaniyaning Lotin Amerikasi bilan yaqin aloqalari uni Yevropaga giyohvand moddalar kirib kelishidagi asosiy darvozalardan biriga aylantiradi. 2024 yilda Ispaniya politsiyasi Ekvadordan kelgan konteyner kemasidan 13 tonna kokainni musodara qilgan — bu mamlakat tarixidagi eng yirik bunday qo‘lga olish holati bo‘lgan.