Markaziy Osiyo va Rossiya energetika bo‘yicha ishchi guruh tuzmoqda

«Markaziy Osiyo – Rossiya» formatidagi ekspert maslahatlashuvlari yakunlariga ko‘ra, Markaziy Osiyo davlatlari bilan energetika bo‘yicha ishchi guruh tuzish to‘g‘risida qaror qabul qilindi. Bu haqda Rossiya energetika vazirligi xabar berdi.

«Energetika vazirligi Markaziy Osiyo davlatlari bilan energetika bo‘yicha ishchi guruh tuzadi. Roman Marshavin RF TIVda bo‘lib o‘tgan «Markaziy Osiyo – Rossiya» formatidagi ekspert maslahatlashuvlarida ishtirok etdi», – deyiladi vazirlik xabarida.

Qayd etilishicha, tadbirda 9 oktyabr kuni Dushanbe shahrida bo‘lib o‘tgan «Markaziy Osiyo – Rossiya» ikkinchi sammiti yakunlari bo‘yicha qabul qilingan 2025-2027 yillarga mo‘ljallangan qo‘shma harakatlar rejasini amalga oshirish bo‘yicha hamkorlik masalalari, shuningdek, tadbir davomida Markaziy Osiyo davlatlari rahbarlari tomonidan ilgari surilgan tashabbuslar ko‘rib chiqilgan.

Bundan tashqari, muhokama yakunlari bo‘yicha vazir o‘rinbosarlari darajasida energetika bo‘yicha ishchi guruh tuzish to‘g‘risida qaror qabul qilingani ma’lum qilingan. U Yonilg‘i-energetika kompleksi yo‘nalishi bo‘yicha o‘zaro hamkorlik masalalarini olti tomonlama formatda ko‘rib chiqish imkonini beradi.

Ishchi guruh tarkibiga Rossiya, O‘zbekiston, Qozog‘iston, Qirg‘iziston, Tojikiston va Turkmaniston energetika idoralari vakillari kiradi.

«Ishchi guruh ishtirokchilari davlat rahbarlari tomonidan ma’qullangan harakatlar rejasini amalga oshirish bo‘yicha tizimli ishlar bilan shug‘ullanadi», – deya RF energetika vaziri o‘rinbosari Roman Marshavinning so‘zlaridan iqtibos keltirilgan xabarda.