15,5 mlrd so‘mlik tenderda qonunbuzilishlar aniqlandi

Raqobat qo‘mitasining Navoiy viloyati hududiy boshqarmasi tomonidan FERGANA AVTOMAT RASCHOT MChJning murojaati bo‘yicha “Hududiy elektr tarmoqlari” AJ Navoiy hududiy filiali tashkil etgan eng yaxshi takliflarni tanlash (tender) savdolarining qonunchilikka muvofiqligi yuzasidan o‘rganish ishlari olib borildi.

Olib borilgan o‘rganishlar natijasida buyurtmachi tashkilot tomonidan o‘tkazilgan boshlang‘ich qiymati 15,5 mlrd so‘mdan ortiq bo‘lgan tanlov savdolarida "Raqobat to‘g‘risida"gi qonun 29-moddasi talablariga rioya qilinmagani qayd etildi. Xususan, savdolarda ishtirokchilar uchun raqobatni cheklaydigan shartlar kiritilgani, tanlov hujjatlarida belgilangan talablar asosida takliflar to‘liq baholanmagani, shuningdek, takliflarni noto‘g‘ri baholash kabi bir qator qonunbuzilish holatlari aniqlangan.

Mazkur holatlardan kelib chiqib, hududiy boshqarmaning maxsus komissiyasi tomonidan buyurtmachi tashkilotga nisbatan “Raqobat to‘g‘risida”gi qonun talablari buzilishi alomatlari bilan ish qo‘zg‘atilib, ishni ko‘rib chiqish yakunlari bo‘yicha moliyaviy jarima qo‘llash haqida qaror qabul qilindi. Shu bilan birga, buyurtmachi tashkilotning mansabdor shaxsiga nisbatan ma’muriy bayonnoma rasmiylashtirilib, belgilangan tartibda sud organlariga yuborildi.

Qonunbuzilishlarni bartaraf etish va kelgusida bunday holatlarga yo‘l qo‘ymaslik maqsadida buyurtmachi tashkilotga bajarilishi majburiy bo‘lgan ko‘rsatma ham berilgan.

Ma’lumot o‘rnida: maxsus komissiyaning mazkur qaroridan norozi bo‘lgan tomon qo‘mitaning apellyatsiya kengashiga yoki sudga murojaat qilish huquqiga ega.