Oʻzbekiston Raqobatni rivojlantirish va isteʼmolchilar huquqlarini himoya qilish qoʻmitasi Perfectum operatorining 100 foiz aksiyalarini VEON guruhi tomonidan sotib olish boʻyicha bitimga shartlar asosida oldindan rozilik bergan. Bu haqda qoʻmita axborot xizmati xabar qildi.
Bitimga rozilik olish boʻyicha ariza VEON guruhiga kiruvchi, Birlashgan Arab Amirliklarida roʻyxatdan oʻtgan “VEON UZB Holding Ltd” kompaniyasi tomonidan berilgan. Kompaniya Perfectum savdo belgisi ostida ishlovchi “Rubicon Wireless Communication” AJ aksiyalarini toʻliq sotib olmoqda.
“VEON UZB Holding Ltd” Oʻzbekistonda Beeline brendi ostida xizmat koʻrsatuvchi “Unitel” MChJning ham 100 foiz ulushiga ega.
Qanday shartlar qoʻyildi?
Qoʻmitaning maxsus komissiyasi tahlillar asosida raqobatni taʼminlashga qaratilgan quyidagi talablarni belgilagan:
Perfectum kamida uch yil davomida alohida faoliyat yuritishi va 5G Standalone texnologiyasi boshqa hududlarga ham kengaytirilishi kerak;
amaldagi abonentlar uchun 5G FWA - simsiz keng polosali internet tariflari 12 oy davomida saqlanishi, yangi abonentlarga qulay shartlar yaratilishi va internetning oʻrtacha tezligi 300 Mbit/s dan pasaytirilmasligi lozim;
abonentlarga shartnoma predmetiga aloqador boʻlmagan shartlar majburan yuklanmasligi, ularning boshqa mobil operatorlarga oʻtish erkinligi cheklanmasligi kerak;
abonentlar Beeline va VEON guruhiga tegishli raqamli platformalar xizmatlaridan foydalanishga majburlanmasligi, raqobatchi xizmatlardan foydalanishiga toʻsqinlik qilinmasligi lozim;
xizmat koʻrsatish shartlari asossiz yomonlashtirilmasligi va abonentlar huquqlari himoya qilinishi kerak;
abonentlarning shaxsiy va tijorat maʼlumotlari himoya qilinishi, ulardan raqobatni cheklash maqsadida foydalanilmasligi hamda qonunchilikka zid ravishda xorijiy serverlarga uzatilmasligi shart.
Shuningdek, kompaniya zimmasiga “Raqobat toʻgʻrisida”gi qonun talablariga rioya qilish va bozorda sogʻlom raqobat muhitini taʼminlash majburiyati qoʻyilgan.
