Sholi va baliqchilik maydonlarida “aqlli” suv hisoblagichlar o‘rnatiladi

Shavkat Mirziyoyev 3 fevral kuni suv resurslaridan samarali foydalanish hamda suv tejovchi texnologiyalarni keng joriy etish bo‘yicha taqdimot bilan tanishdi. Unda sholi yetishtiriladigan va baliqchilik xo‘jaliklari tashkil etilgan yerlarda suvni hisobga olish tizimini raqamlashtirishga qaratilgan yangi choralar muhokama qilindi.

Prezidentga taqdim etilgan ma’lumotlarga ko‘ra, suv olish joylarida suvni boshqarish va hisobini yuritishni takomillashtirish maqsadida sholi maydonlari hamda baliqchilik xo‘jaliklari joylashgan yerlarda “aqlli” suv o‘lchash va hisoblash vositalari o‘rnatiladi. Ushbu qurilmalar “Suv hisobi” axborot tizimiga integratsiya qilinishi rejalashtirilgan.

Taqdimotda, shuningdek, sohada davlat nazoratini kuchaytirish masalalariga ham e’tibor qaratildi. Xususan, «Suvxo‘jaliknazorat» inspeksiyasi hududiy bo‘linmalarida suv tejovchi texnologiyalardan hamda suvdan foydalanishni monitoring qilish bo‘limlari tashkil etilishi ko‘zda tutilmoqda. Tadbirkorlik sub’yektlarida o‘tkaziladigan tekshiruvlarni yonkameralardan foydalangan holda amalga oshirish tartibi joriy etilishi, qishloq xo‘jaligi ekin maydonlarida suv sarfi va isrofini monitoring qilish uchun dronlardan foydalanishga ruxsat berilishi aytildi.

Suv tejovchi texnologiyalar o‘rnatilgan va subsidiya ajratilgan maydonlarda ulardan maqsadli foydalanish ustidan nazorat kuchaytiriladi. Bunday texnologiyalarni ishlatmasdan an’anaviy usulda sug‘orish suvdan o‘zboshimchalik bilan foydalanish deb baholanishi ta’kidlandi.