Линдси Вонн тез тушишда 13 рақам остида старт қилганди. У стартдан кейинги 13-сонияда катта тезликда дарвозалардан бирига тегиб кетиб, мувозанатини йўқотди ва йиқилди.
Трансляция чоғида унинг қисқириғи ҳамда уни пастда кутиб турган жамоадошлари ҳамда мухлисларининг ҳайқириқлари ҳам эшитилган.
Спортчи мустақил равишда ўрнидан тура олмаган ва уни трассадан вертолётда олиб кетишган.
Унинг ҳолати ҳақида ҳозирча ҳеч нарса маълум эмас. «Унинг барча жарроҳлари, ходимлари [физиотерапевтлар] ва шифокорлари шу ерда, шунинг учун улар бизга хабар беришига ишончим комил. Менимча, ҳозир уни текширувдан ўтказишмоқда, биз фақат шуни эшитдик», – деди Вонннинг синглиси Карин Кидо.
Бу трассада Вонндан кейин яна икки спортчи йиқилиб тушган – Нина Ортлиб (Австрия) ва Канде Морено (Андорра). Ортлиб трассани ўзи тарк этган, Моренони эса худди Вонн каби вертолётда эвакуация қилишган.
Мусобақада Бризи Жонсон ғолиб чиқиб, АҚШ учун бу Олимпия ўйинларидаги илк олтин медални олиб келди. Иккинчи ва учинчи ўринларни мос равишда германиялик Эмма Айҳер ҳамда италиялик София Годжа қўлга киритган.
Линдси Вонн 41 ёшда. 2010 йилда у Ванкувер Олимпиадасида олтин медални қўлга киритган. Бундан ташқари, у тўрт карра Жаҳон кубоги Катта биллур глобуси (2008, 2009, 2010, 2012) ва икки карра жаҳон чемпиони бўлган. Вонн мунтазам равишда оғир жароҳатлар билан курашган, 2019 йилда навбатдаги жароҳатдан сўнг фаолиятини якунлашини эълон қилганди.
Беш йиллик танаффусдан кейин, 2024 йилда Вонн тизза бўғимини алмаштириш бўйича муваффақиятли операция қилинди, шундан сўнг у Миландаги Олимпиадада қатнашиш учун профессионал спортга қайтишга қарор қилди.
2025 йил декабрида Вонн Жаҳон кубоги босқичларидаги 83-олтин медалини қўлга киритади ва бу даражадаги мусобақада ғолиб чиққан энг катта ёшли спортчига айланади.
2026 йил январ ойи охирида, Италиядаги ўйинлардан бир ҳафта олдин, Вонн Жаҳон кубогининг Кран-Монтанадаги (Швейцария) босқичидаги иштироки вақтида йиқилиб оғир жароҳат олди – унинг тиззасининг олдинги хочсимон боғлами йиртилиб кетганди. Шунга қарамай, у барибир Олимпиадада қатнашишга қарор қилганди – у Кортина д'Ампеццо трассаси ўзининг энг севимли трассаларидан бири экани ва айнан шу ерда спортчилик фаолиятини якунламоқчилигини айтиб келарди. У фаолиятида илк бор, 2004 йилда ушбу трассада учинчи ўринни эгаллаб, подиумга кўтарилган, кейинроқ бу трассада бўлиб ўтган жаҳон кубоги босқичларида 12 марта олтин медал қўлга киритганди.
