IIVda uyushgan jinoyatchilik, narko va kiberjinoyatlarga qarshi choralar muhokama qilindi

2026 yil 27 yanvar kuni prezident rahbarligida o‘tkazilgan yig‘ilishda berilgan topshiriqlar ijrosi, mahallalarda xavfsiz muhitni yaratish bo‘yicha amalga oshirilayotgan ishlar hamda yo‘l qo‘yilgan kamchiliklar yuzasidan Ichki ishlar vazirligi rahbariyati ishtirokida tanqidiy yig‘ilish bo‘lib o‘tdi.

Yig‘ilishda ichki ishlar vazirining birinchi o‘rinbosari general-mayor B. Qudratxo‘jayev, Ichki ishlar vaziri o‘rinbosari polkovnik R. Ashropov, vazirlik sohaviy xizmat rahbarlari, Toshkent shahri va Toshkent viloyati IIBB, shuningdek barcha viloyatlar ichki ishlar boshqarmalari rahbariyati ishtirok etdi. Shu bilan birga, viloyat sohaviy xizmatlari, shahar-tuman ichki ishlar bo‘limlari rahbarlari hamda tergovga qadar tekshiruv harakatlarini olib borishga mas’ul xizmat xodimlari — huquqbuzarliklar profilaktikasi, tezkor-qidiruv, yo‘l harakati xavfsizligi xizmatlari va tergov bo‘linmalari vakillari ham tadbirga jalb qilindi.

Tadbir davomida jinoyatga oid arizalar, xabarlar va boshqa ma’lumotlarni qabul qilish hamda ko‘rib chiqish amaliyoti, qabul qilingan qarorlarning qonuniyligi va ijro intizomi holati chuqur tahlil qilindi. Mavjud kamchiliklar tanqidiy muhokama qilinib, ularni bartaraf etish bo‘yicha aniq choralar belgilandi.

Shuningdek, prezident tomonidan Toshkent shahrida xavfsiz muhitni shakllantirish bo‘yicha o‘tkazilgan tanqidiy selektor yig‘ilishida belgilangan vazifalar, xususan, uyushgan jinoyatchilik, narkojinoyatlar, kiberjinoyatchilik va yashirin iqtisodiyotga qarshi kurashish bo‘yicha “poytaxt namunasi”ni viloyatlarda joriy etish masalalari muhokama qilindi.

Yig‘ilish yakunida qonun ustuvorligini ta’minlash, jinoyatlarni hisobdan yashirish holatlariga qat’iy yo‘l qo‘ymaslik, shuningdek xodimlarning bilim va kasbiy salohiyatini oshirish bo‘yicha bir qator vazifalar belgilab berildi. Xususan, tergovga qadar tekshiruvni amalga oshiruvchi xodimlarni o‘qitish va huquqiy bilimini oshirish maqsadida Tergov departamenti mas’ullari hamda IIV Akademiyasi professor-o‘qituvchilaridan iborat ishchi guruh tomonidan o‘quv-seminarlar rejalashtirilgani aytildi.

Shuningdek, barcha hududlarda Huquqni muhofaza qilish akademiyasi tomonidan ushbu soha vakillarini onlayn tarzda o‘qitish bo‘yicha tegishli chora-tadbirlar belgilangani ma’lum qilindi.