Yer kodeksiga qo‘shimcha: ayrim yer uchastkalari meros tarkibiga kiritiladi

So‘nggi yillarda ko‘chmas mulk kadastri va qurilish sohasida keng ko‘lamli islohotlar amalga oshirilganiga qaramasdan, aholining salmoqli qismida hujjatlashtirilmagan uy-joylar, ro‘yxatdan o‘tmagan obektlar va rasmiylashtirilmagan meros ishlari saqlanib qolmoqda. Shu sabab yer uchastkalari va ularda joylashgan qurilma hamda inshootlar bilan bog‘liq meros munosabatlarini huquqiy jihatdan tartibga solish zarurati mavjud.

Qonun loyihasiga muvofiq, vafot etgan shaxsga belgilangan tartibda davlat ro‘yxatidan o‘tkazilgan doimiy foydalanish (doimiy egalik qilish) yoki meros qilib qoldiriladigan umrbod egalik qilish huquqi asosida tegishli bo‘lgan yer uchastkalari, agar ular bino va inshootlar bilan band etilmagan bo‘lsa yoki yerdagi bino-inshootlarga bo‘lgan huquqlar davlat ro‘yxatidan o‘tkazilmagan bo‘lsa ham, meros tarkibiga kiritilishi nazarda tutilmoqda.

Yer uchastkasiga bo‘lgan huquqning meros orqali boshqa shaxsga o‘tishi notarial tartibda tasdiqlangan guvohnoma asosida Ko‘chmas mulk obektlariga bo‘lgan huquqlarning davlat reyestriga yangi ega haqidagi ma’lumotlarni kiritish hamda huquqni davlat ro‘yxatidan o‘tkazish orqali rasmiylashtiriladi.

Shuningdek, xususiylashtirilgan yer uchastkasiga bo‘lgan mulk huquqi sotib olish, hadya qilish, ayirboshlash, meros qilib olish va qonunchilikda nazarda tutilgan boshqa asoslarga ko‘ra boshqa shaxsga o‘tganda, mulkdor haqidagi ma’lumotlar davlat reyestriga kiritilib, mulk huquqi belgilangan tartibda ro‘yxatdan o‘tkaziladi.

Loyihada “Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida”gi qonunga ham qo‘shimchalar kiritish nazarda tutilgan. Unga ko‘ra, marhumga tegishli yer uchastkalarida joylashgan va qurilishi tugallangan binolar hamda inshootlarga bo‘lgan mulk huquqi yaqin qarindoshlar arizasiga asosan marhum nomiga davlat ro‘yxatidan o‘tkazilishi mumkin. Qurilishi tugallanmagan obektlar bo‘yicha ham shunga o‘xshash tartib joriy etilishi taklif etilmoqda.