Epshteyn ishi: Davosdagi forum rahbari iste’foga chiqdi

Epshteyn voyaga yetmaganlarni fohishalikka majburlashda ayblangan, 2019 yilda esa Manhettendagi turma kamerasida osilgan holda topilgan. Bu haqda 26 fevral, payshanba kuni Reuters agentligi xabar berdi.

AQSh Adliya vazirligi avvalroq Brende Epshteyn bilan uch marta kechki ovqatda uchrashgani, shuningdek u bilan elektron pochta orqali muloqot qilgani va matnli xabarlar almashgani haqidagi ma’lumotlarni oshkor qilgan edi.

«Chuqur o‘ylab ko‘rgandan so‘ng, Jahon iqtisodiy forumi rahbari va bosh ijrochi direktori lavozimidan ketishga qaror qildim. Bu yerda 8 yarim yil davom etgan faoliyatim juda samarali bo‘ldi», — dedi Norvegiyaning sobiq tashqi ishlar vaziri. «Hamkasblar, hamkorlar va fikrdoshlarga ajoyib hamkorlik uchun minnatdorman va hozir forum muhim ishlarini hech qanday chalg‘ituvchi omillarsiz davom ettirishi uchun munosib payt, deb hisoblayman», — deya qo‘shimcha qildi u.

Brende aytishicha, u Epshteyn bilan 2018 yilda birinchi marta uchrashguncha uning o‘tmishidan va jinoiy faoliyatidan bexabar bo‘lgan va bu masala bo‘yicha yetarlicha chuqur tekshiruv o‘tkazmaganidan afsusda ekanini bildirgan.

JIF hamraislari Andre Hoffman va Larri Fink alohida bayonotda Brendega nisbatan mustaqil ekspertlar o‘tkazgan tashqi tekshiruv yakunlanganini qayd etdi. Unga nisbatan qo‘shimcha shubhali holatlar aniqlanmagan. Alois Tsvinggi vaqtinchalik rahbar va bosh ijrochi direktor vazifasini bajaradi, forum vasiylar kengashi esa rahbariyat almashinuvi jarayonini nazorat qiladi.

Byorge Brende 2017 yildan beri JIF rahbari lavozimida ishlab kelgan.

Amerikalik moliyachi Jyeffri Epshteyn 2008–2009 yillarda fohishalikni tashkil etgani uchun jazo o‘tagan. U 2019 yil 6 iyul kuni voyaga yetmaganlarni fohishalikka majburlash aybi bilan hibsga olingan, 10 avgust kuni esa sudni kutayotgan paytida Manhettendagi turma kamerasida osilgan holda topilgan.

2025 yil dekabr oyida Epshteyn ishi bo‘yicha hujjatlarning birinchi qismi e’lon qilingan.

AQSh Adliya vazirligi 2026 yil 30 yanvar kuni «Epshteyn fayllari»dan yana 3 million sahifadan ortiq hujjat, shuningdek ishga oid 2000 ta videoyozuv va 180 mingta boshqa tasvirni oshkor qilgan.

Epshteyn ishiga oid avvalroq e’lon qilingan materiallar bir qator taniqli shaxslar bilan bog‘liq aloqalarni ham ko‘rsatgan — jumladan, Britaniya shahzodasi Endryu, u shu sababli o‘z unvonidan mahrum bo‘lgan. Bundan tashqari, JPMorgan banki Epshteynni ko‘p yillar mijoz sifatida xizmat ko‘rsatgani uchun jabrlanuvchilar bilan suddan tashqari kelishuv doirasida 290 mln dollar to‘lagan. AQSh Adliya vazirligi ma’lumotiga ko‘ra, ish materiallarida 1200 nafardan ortiq jabrlanuvchi aniqlangan.