Urush tufayli Yaqin Sharq osmoni yopilgan. Aeroportlarda o‘n minglab sayyohlar qolib ketgan

1 mart kuni tongda Dubay aeroporti joylashgan hududda urib tushirilgan Eron dron parchalari qulagani qayd etilgan.

Foto: Videodan kadr

Harbiy harakatlar tufayli 1 mart kuni ham Yaqin Sharqdagi aeroportlar yopiqligicha qolmoqda. France 24 ma’lumotiga ko‘ra, Isroil, Qatar, Suriya, Eron, Iroq, Kuvayt, Bahrayn va Birlashgan Arab Amirliklari o‘z havo kengliklarini yopishgan.

Yaqin Sharqdagi asosiy aeroportlar – Dubay, Abu-Dabi va Doha aeroportlari yopilgan. Yaqin Sharqda ishlovchi aviakompaniyalar 1800 dan ortiq reyslarni bekor qilishgan.

Aviatsiya sohasini tahlil qiluvchi Cirium kompaniyasi ma’lumotiga ko‘ra, ushbu aeroportlarda ishlovchi eng yirik uchta aviakompaniya – Emirates, Qatar Airways va Etihad – odatda kuniga 90 ming atrofidagi yo‘lovchiga xizmat ko‘rsatadi.

AQSh va Isroil 28 fevral kuni tongida Eronga qarshi urush boshlab, mamlakatdagi harbiy obektlar bo‘ylab davomli zarbalar yo‘lladi. Eron esa bunga javoban Isroil hududiga va Amerikaning mintaqadagi harbiy bazalariga hujum qilmoqda. Bir qancha aeroportlar, jumladan, Dubaydagi aeroport ham zarbalar ostida qolgan.

Tayyorlagan Азиз Қаршиев

#Eron #Dubay

Eron yadro dasturi bo‘yicha muzokaralar samarasiz tugashi ortidan, 2026 yil 28 fevral kuni AQSh va Isroil Eron hududiga zarbalar bera boshladi. Prezident Donald Tramp hujumlardan maqsad Tehrondagi rejimni ag‘darish ekanini e’lon qildi. Eronning javob zarbalari AQShning Yaqin Sharqdagi bazalari va Isroil hududlariga qaratildi. Mintaqadagi qator shaharlarda dronlar yoki raketalar qulashi kuzatildi.