17 ming o‘zbekistonlik Yaqin Sharqdan qaytarildi. Vazirlik turoperatorlarni mas’uliyatli bo‘lishga chaqirdi

7 mart soat 07:00 holatiga ko‘ra, Yaqin Sharq mamlakatlaridan 17 152 nafar o‘zbekistonlik vatanga qaytarildi.

O‘zbekiston Tashqi ishlar vazirligi xabariga ko‘ra:

• Saudiya Arabistonidan – 14 502 nafar;
• Birlashgan Arab Amirliklaridan – 2 356 nafar;
• Erondan – 42 nafar;
• Qatardan – 218 nafar;
• Bahrayndan – 27 nafar;
• O‘mondan – 7 nafar vatandosh olib kelingan.

“Qaytarish ishlari asosan fuqarolik aviatsiyasi uchun havo hududi ochiq bo‘lib turgan mamlakatlar orqali amalga oshirilmoqda”, – deyiladi TIV xabarida.

O‘zbekiston Transport vazirligiga ko‘ra, Yaqin Sharq mamlakatlaridagi vatandoshlarni olib chiqish vaqtida ularning qariyb 95 foizi tur paketlar asosida borgani kuzatilmoqda. Vazirlik shu munosabat bilan turoperatorlar va sayyohlik agentliklariga murojaat qildi.

“Holatning eng achinarli tomoni, turoperatorlar va agentlar tomonidan o‘z mijozlarini tashlab ketish va ular bilan aloqani uzish, shuningdek, yuzaga kelgan fors-major holatida yo‘lovchilarni tezkor ma’lumotlar bilan ta’minlamay, ijtimoiy tarmoqlarda videoroliklar tarqatish orqali manipulyatsiya qilish, o‘z majburiyatlarini bajarish o‘rniga yo‘lovchilarni elchilar va konsullar bilan qoldirib ketish holatlariga guvoh bo‘linmoqda.

Barcha tur paketlar mehmonxonalar, aviaqatnovlar, transferlar va sug‘urta polislarini o‘z ichiga oladi. Sug‘urta polisi shartlariga muvofiq, fors-major holatlarida sug‘urta polislarini yo‘lovchilarning mehmonxona, transport va evakuatsiya bo‘yicha barcha xarajatlarini qoplashi belgilangan, buning uchun turoperatorlar va agentlar barcha ishlarni tizimli to‘g‘ri tashkillashtirishi talab etiladi”, – deyiladi vazirlik bayonotida.

Transport vazirligi:

• barcha turoperatorlar va agentlardan yuzaga kelgan fors-major holatida ham iste’molchilar huquqlarini so‘zsiz ta’minlash, mijozlar bilan tuzilgan shartnoma shartlarga to‘liq rioya etish va har bir fuqaro bilan muntazam aloqani ta’minlagan holda ularga tezkor yordam ko‘rsatish, aviakompaniyalar bilan amaldagi shartnomalardan unumli foydalangan holda aviachiptalarni parvozlar amalga oshirilayotgan shaharlardagi muntazam aviaqatnovlarga o‘zgartirish orqali o‘z mijozlarini xavfsiz hududga olib chiqishda hukumat bilan birgalikda harakatlanishga;
• barcha rezident va xorijiy aviakompaniyalarni xalqaro aviatashuvlar qoidalari hamda O‘zbekiston va xorijiy davlatlar o‘rtasida imzolangan aviatashuvlar to‘g‘risidagi xalqaro bitim shartlariga amal qilish, o‘z majburiyatlarini bajarish, ishlarni tizimli tashkil qilish, sug‘urta polislaridan to‘g‘ri foydalanish, aviakompaniyalar va davlatlar imijiga putur yetkazishi mumkin bo‘lgan xatti-harakatlardan tiyilishga chaqirdi.

Ta’kidlanishicha, Qatarda qolgan vatandoshlarni Saudiyaning Riyoz aeroporti orqali olib chiqish bo‘yicha tashkiliy ishlar amalga oshirilmoqda.

Hozirda Quvayt, Qatar va Bahraynga yaqin bo‘lgan Saudiyaning Dammam va Riyoz aeroportlaridan barcha xalqaro yo‘nalishlarda muntazam aviaqatnovlar cheklovlarsiz amalga oshirilmoqda va aviachiptalar sotuvi amalda mavjud.

“Turoperatorlar aviachiptalarni va parvoz mavjud bo‘lgan yo‘nalishlarga qayta rasmiylashtirib, ishni tizimli tashkil etish imkoniyatiga ega. Saudiyaning Jidda va Madina yo‘nalishlaridagi parvozlar har doimgidek to‘liq shtat holatida amalga oshirilmoqda.

Ayni damda aviatashuvlarni tashkillashtirish ishlari tizimli ravishda davom ettirilmoqda. Fuqarolarimizdan ehtiroslarga berilmaslik, o‘z turoperatorlari va agentlari bilan doimiy aloqada bo‘lishlari so‘raladi”, – deyiladi Transport vazirligi e’lonida.

Repatriatsiya jarayoni uchun “O‘zaviatsiya” agentligida 24/7 rejimda shtab va koll-markaz (78 120-00-72; 71 200-07-65), Tashqi ishlar vazirligida 24/7 rejimda ishlaydigan koll-markaz (97 136-51-51) tashkil etilgan.