Termizda O‘zbekiston–Rossiya konferensiyasi bo‘lib o‘tadi

30–31 mart kunlari Termiz shahrida “O‘zbekiston–Rossiya: Yevrosiyo makonida strategik hamkorlik” mavzusida xalqaro konferensiya tashkil etiladi. Tadbirda ikki davlatning davlat idoralari, ekspert va ishbilarmon doiralari vakillari ishtirok etadi.

Foto: Kun.uz

Ma’lum qilinishicha, konferensiya O‘zbekiston prezidenti huzuridagi Strategik va mintaqalararo tadqiqotlar instituti hamda “Valday” xalqaro munozara klubi hamkorligida o‘tkaziladi.

Tadbir O‘zbekiston va Rossiyadan taniqli ekspertlar, davlat tashkilotlari va ilmiy-tadqiqot markazlari vakillarini bir maydonga jamlaydi.

O‘zbekiston tomonidan SMTI direktori Eldor Aripov, Surxondaryo viloyati hokimi Ulug‘bek Qosimov, tashqi ishlar vaziri o‘rinbosari Bobur Usmonov, raqamli texnologiyalar vazirining birinchi o‘rinbosari Oleg Pekos, Makroiqtisodiy va hududiy tadqiqotlar instituti direktori Umid Obidxo‘jayev va boshqalar ishtirok etadi.

Rossiya delegatsiyasi tarkibi tashqi ishlar vaziri o‘rinbosari Mixail Galuzin, elchi Aleksey Yerxov, “Valday” klubi fondi Kengashi raisi Andrey Bistritskiy, shuningdek boshqa nufuzli ekspertlardan iborat bo‘ladi.

Konferensiyaning asosiy maqsadi O‘zbekiston–Rossiya strategik hamkorligini mustahkamlash, savdo-iqtisodiy, investitsiya, transport va texnologik sohalardagi hamkorlik istiqbollarini belgilab olishdan iborat.

Tadbir doirasida Yevrosiyoda xavfsizlik va barqarorlik, sanoat hamkorligi, investitsiyalar, raqamlashtirish hamda transport va savdo infratuzilmasini rivojlantirish masalalari muhokama qilinadi.

Shuningdek, Tatariston Respublikasi delegatsiyasi ishtirokida hududlararo hamkorlikka bag‘ishlangan alohida sessiya tashkil etilishi rejalashtirilgan.

Konferensiya Termiz xalqaro savdo markazida bo‘lib o‘tadi.