Sibirda qoramollar so‘yilishi: hokimiyat so‘nggi reyd haqida ma’lum qildi

Novosibirsk viloyatida mahalliy hokimiyat pasterellyozga qarshi kurash bilan izohlayotgan yirik xo‘jaliklardagi uy hayvonlarini majburiy tarzda olib qo‘yish ishlari yaqin orada yakunlanishi e’lon qilindi.

“Bizda yirik xo‘jaliklarda kasallik o‘choqlari bor edi va shulardan bugun ish olib borilayotgan so‘nggisi qoldi. Kasallik holatlari kuzatilayotgan boshqa xo‘jaliklar yo‘q”, — dedi viloyat gubernatori va hukumati ma’muriyati axborot siyosati departamenti rahbari Sergey Neshumov 20 mart, juma kuni. Shu bilan birga, uning so‘zlariga ko‘ra, shaxsiy yordamchi xo‘jaliklar bilan ish davom etadi.

Neshumovning aniqlik kiritishicha, hayvonlar Kozixa qishlog‘idagi “Vodoley” dehqon-fermer xo‘jaligidan olib qo‘yilmoqda. Mahalliy aholi ijtimoiy tarmoqlarda aholi punkti tomon politsiya mashinalari va avtozaklar olib kelingani haqida yozgan. Hududiy ommaviy axborot vositalari esa qishloqqa kuchishlatar tuzilmalar kelgani sababli aloqa o‘chirilganini qayd etmoqda.

“Vodoley” xo‘jaligi rahbari Vladimir Gurkin avvalroq uning hayvonlari sog‘lom ko‘ringanini aytgan edi. Uning so‘zlariga ko‘ra, fevral oxirida fermadagi barcha hayvonlarga qandaydir noma’lum vaksina qilingan, shundan keyin bir nechta jonivor kasallanib qolgan. Gurkinga qaysi kasallik aniqlangani ma’lum emas, chunki tahlil natijalari unga taqdim etilmagan.

Avvalroq Rossiyaning bir qator hududlarida hokimiyat uy hayvonlarini ommaviy ravishda so‘yishga yuborgani ma’lum bo‘lgan edi. Bu esa fermerlarning noroziligiga sabab bo‘ldi, chunki ularga hech qanday tahlil natijalari ko‘rsatilmaganini, olib qo‘yilgan hayvonlar esa sog‘lom ko‘ringanini ta’kidlagan.

Mutaxassislar bu favqulodda choralarning haqiqiy sababi boshqa kasallik — ya’ni oqsil (yashchur) avji olishi bo‘lishi mumkin, deb gumon qilmoqda. Bu kasallik pasterellyozdan farqli ravishda davolanmaydi.

Yashchur kasalligi qayd etilgan mamlakatlar bu haqda Jahon hayvonlar salomatligi tashkilotiga xabar berishi shart. Shu bilan birga, go‘sht va sut mahsulotlari eksportiga cheklovlardan qochish uchun hokimiyatlarda bunday ma’lumotni bermaslik ham kuzatiladi.