“Toza havo” umummilliy loyihasini amalga oshirish yuzasidan prezident farmoni qabul qilindi.
Unga ko‘ra, 2026 yil yakuniga qadar:
- Chilonzor tumani Lutfiy mahallasi Bog‘iston ko‘chasida joylashgan Toshkent shahri onkologiya shifoxonasi o‘rnidagi 4,36 gektarda yashil jamoat parki tashkil etilishi;
- Toshkent shahrida 4 ta sun’iy ko‘l yoki suv havzalari tashkil etilishi lozim.
2026 yil 1 apreldan quyidagi ekologik obektlarni barpo etishni ham boshlash vazifasi qo‘yildi:
- Mirzo Ulug‘bek tumanidagi Fanlar akademiyasining Yadro fizikasi instituti va unga tutash bo‘lgan 250 gektarda dendrologiya bog‘i (Yoqilg‘i-energetika va kimyo sanoati sohasi kadrlarini qayta tayyorlash va ularning malakasini oshirish markazi hamda “O‘zbekiston-Koreya kimyo texnologiyalari innovatsiya markazi”ni tashkil qilishga mo‘ljallangan yer maydoni bundan mustasno);
- Markaziy Osiyo atrof-muhit va iqlim o‘zgarishini o‘rganish universiteti (Green University) qarshisidagi Toshkent va Qibray tumanlaridagi 83 gektarda dendrologiya bog‘i;
- chang bo‘ronlarining oldini olish uchun Surxondaryo va Sirdaryo viloyatlarida “yashil devor”lar;
- Toshkent shahrida faoliyat olib borayotgan davlat oliy ta’lim muassasalari hududida kamida 1 ta, jami 15 ta favvora;
- Toshkent shahrining har bir tumanida shaharsozlik normalaridan kelib chiqib kamida bittadan favvora.
Jahon bankining “O‘zbekistonda barqaror o‘rmon landshaftlarini tiklash” loyihasi doirasida ko‘zda tutilgan mablag‘larning bir qismini Toshkent shahri atrofida “yashil belbog‘” barpo etish loyihasiga yo‘naltirish ko‘zda tutilmoqda. Bu haqdagi qaror loyihasini 1 oy muddatda kiritish vazifasi belgilandi.
