YUNISEF Eron rasmiylaridan bolalarni harbiy xizmatga yollashni to‘xtatishni talab qildi

BMT Bolalar fondi (YUNISEF) Eron rasmiylaridan voyaga yetmaganlarni harbiy operatsiyalarga jalb qilishni to‘xtatishni talab etdi. Tashkilot bolalar jalb etilayotgan safarbarlik kampaniyalari, jumladan, ularning nazorat-o‘tkazish punktlarida xizmat o‘tashi holatlari haqida ma’lumotga ega ekanini ma’lum qildi:

«Biz Eronni bolalarni har qanday yollashni to‘xtatishga chaqiramiz. Qurolli kuchlar yoki guruhlar tomonidan bolalarni yollash va ulardan foydalanish bola huquqlarini qo‘pol ravishda buzish hisoblanadi».

Murojaat Amnesty International hisobotidan keyin e’lon qilindi, unda tashkilot Eron rasmiylarining harakatlarini «harbiy jinoyat» sifatida baholadi. Huquq himoyachilarining qayd etishicha, Islom inqilobi qo‘riqchilari korpusi (IIQK) blokpostlarda xizmat qilish, patrullik qilish va qurolli kuchlarni logistika bilan ta’minlash uchun 12 yoshdan boshlab ko‘ngillilarni yollash kampaniyasini boshlagan. Amnesty Kalashnikov avtomatlari bilan qurollangan bolalarning 16 ta fotosurati va videoyozuvlarini tahlil qildi, shuningdek, Tehron, Karaj va Rashtdan to‘rt nafar guvohning ko‘rsatmalarini keltirdi.

Tashkilot 29 mart kuni Tehrondagi blokpostda Isroil droni zarbasi oqibatida 11 yoshli Alirizo Jafariy halok bo‘lgani haqida xabar bergan edi - huquq himoyachilariga ko‘ra, u shaxsiy tarkib yetishmasligi sababli harbiy xizmatchi otasi bilan birga bo‘lgan. Amnesty International ma’lumotlariga ko‘ra, urush paytida AQSh-Isroil zarbalari chog‘ida kamida 216 bola halok bo‘lgan.

Ta’kidlanishicha, voyaga yetmaganlarni qurolli kuchlarga yollash Eron rasmiylarining uzoq yillik amaliyotidir. Amnesty International hisobotida yozilishicha, Tehronning o‘zi tan olganidek, 1980-yillardagi Eron-Iroq urushi yillarida 550 mingdan ortiq bola armiyaga yuborilgan, ularning o‘n minglab nafari halok bo‘lgan. Xalqaro gumanitar huquqqa ko‘ra, 15 yoshgacha bo‘lgan bolalarni qurolli tuzilmalarga chaqirish harbiy jinoyat sifatida baholanadi.