San’atkorlarni soliqqa tortishni taklif etuvchi qaror loyihasi muhokamasi 10 aprel kuni yakuniga yetadi. Fikr bildirgan san’atkorlarning deyarli hammasi bunga qarshi. Faollar hujjat chala ekanidan norozi, biroq odamlar san’atkorlar ham hamma qatori soliqqa tortilishi tarafdori. Kun.uz bilan suhbatlashganlar fikricha, soliq haq, biroq hozir san’atkorlardan undirilayotgan boshqa to‘lovlar masalasini qayta ko‘rib chiqish kerak.
Normativ-huquqiy hujjatlar loyihalari muhokamasi portalida turgan “Konsert-tomosha faoliyatini amalga oshiruvchi shaxslarni soliqqa tortish va hisobini yuritish tizimini soddalashtirish to‘g‘risida”gi loyihani Adliya vazirligi muallif sifatida muhokamaga qo‘ygan.
10 aprelga qadar davom etuvchi bu muhokamalar chog‘ida fikr bildirgan san’atkorlarning deyarli hammasi ushbu tizimdan noroziligini bildirdi. Jamoatchilik faollari esa soliq faqat xonandalarga solinayotgani bir tomonlama va uzoqni o‘ylanmagan taomil bo‘lgani sabab, loyihani nomukammallikda ayblamoqda. Jamiyat a’zolarining aksariyati esa san’atkorlarni soliqqa tortish taklifini olqishladi.
Kun.uz bilan suhbatlashganlar fikricha, san’atkorlar soliqdan qochmaydi, biroq agar soliq joriy qilinadigan bo‘lsa, hozir undirilayotgan boshqa to‘lovlar masalasini qayta ko‘rib chiqish kerak bo‘ladi.
O‘zbekiston Qahramoni, O‘zbekiston xalq artisti – Munojat Yo‘lchiyevaga ko‘ra, bu 1-2 kunda hal bo‘ladigan masala emas.
“Biz san’atkorlar davlat tomonidan ishlab chiqilib, qabul qilinayotgan har bir hujjatga bo‘ysunamiz, amal qilamiz. Biz soliq to‘lashga qarshi emasmiz, lekin litsenziya-chi? Agar soliq joriy qilinsa, litsenziya uchun to‘lov ham davom etadimi?” – deydi u.
Soliq qo‘mitasining Jismoniy shaxslarning daromad solig‘i ma’muriyatchiligi boshqarmasi boshlig‘i o‘rinbosari Po‘lat Davletov fikricha esa, san’atkorlar qaror loyihasini o‘qimasdan turib shovqin ko‘tarishdi.
“Avvaliga san’atkorlar bu loyiha ekanini, hali muhokama bosqichidaligini tushunishi kerak edi. Ular loyihani o‘qib, tushunib olishlari lozim. Samandar soliq e’lon qilindi deb xato gapirdi, soliq solingani yo‘q, bu faqat taklif etilmoqda hali”,
