Ўзбекистон халқ артисти Юлдуз Усмонова 12—30 апрел кунлари бўлиб ўтадиган яккахон концерти олдидан интервью берди. У суҳбат давомида концертга тайёргарлик, янги дастур ҳақида гапириб, хонандаларнинг солиқ тўлаши кераклиги ҳақидаги қарор лойиҳасига ўз муносабатини билдирди.
Юлдуз Усмонова ўтган йилги концертида “Мен мухлисларни йиғлатмайман, тафаккур қилдираман. Сабаби ҳаёт ташвишининг ўзи етарли”, деган эди. Бу йилги концертда хонанда қандай ғояни илгари суради?
— Тафаккур қилган одам йиғламайдими? Ўзининг қилган хатосидан йиғлайди, бировдан ўпкалаб эмас. Йиғи билан йиғининг фарқи бор-да. Сиз билан мен ҳам кўп ёлғонни, ҳаромни, ҳақсизликни кўриб, индамай кетяпмиз-ку! Бойкотларни кўриб туриб, маҳсулотларни индамай сотиб олиб, еб, болаларимизга олиб беряпмиз-ку! Виждон қийналса, йиғлайсиз-да, бу оддий мисол. Одамлар қўшиқда ўзини топиб олса, йиғлаши мумкин. Бундай йиғига ҳеч кимнинг қаршилиги йўқ. Мақсадимиз уларнинг юрагини эзиш эмас.
Бизнинг пайтларда 80 фоиз қўшиқлар йиғлатадиган ва маъноли бўларди. Одам шу қўшиқлардан енгиллик топса, албатта, йиғласин. Йиғлаб-йиғлаб, юзини ювиб, кўзига яна сурмасини суртиб, кўчага чиқиб, ҳаёт яна давом этаётганини ҳис қилади. Йиғлатиш деганда шуни назарда тутаман, дейди у.
“Менчалик ишлайдиган одам қолмади”
— Тапир-тупур, бетартиб концертларга пул тўлаб, кираётганлар бор. Шунча кун концерт беряпман, ўзимнинг бошимга сув ўгириб юбордим. Ўзимга ўзим чарчама, Усмонова, дедим. Бунчалик ишлайдиган одам қолмади. Ғам-ташвишсиз ўртага чиқиб олиб, ашула айтишяпти. Мен сиқиляпман, ҳар куни дори ичаман. Ўзимни қандай тинчлантиришни билмайман. Мендан неча ёшга етдингиз, деб кўп сўрашади. Турмуш ўртоғим нега сиқиласиз, дейди. Қандай қилиб сиқилмай? Мен болаларим билан саҳнага чиқяпман, тасаввур қиляпсизми? Қандай қилиб хавотир олмаслигим мумкин?
Менимча, гап костюмларда, гапларда, иддао қилишда, чиройли ёндирилган чироқларда эмас. У шундоқ ҳам керак, қиламиз. Қўшиқлар ўз ўрнини топса, Юлдузни Юлдуз деб эслашади. Концертида зўр лазер, чироқ қилган эди, деб эслашмайди. Еттидан етмишгача эсланяпманми, демак, қўшиқлар яшаяпти. Мен қўшиқлар яшаши тарафдориман, дейди Юлдуз Усмонова.
Ўзбекистонда 2026 йил 1 сентябрдан бошлаб санъаткорлар ва бошловчилар кўрсатадиган хизматларни “Солиқ” иловасида рўйхатга олиш ҳамда “бир хизмат – бир тўлов” тамойили асосида солиққа тортиш режалаштирилмоқда. Мазкур қарор лойиҳасининг эълон қилиниши шоу-бизнес вакиллари ўртасида кенг муҳокама ва эътирозларга сабаб бўлмоқда. Ўзбекистон халқ артисти Юлдуз Усмонова бу борада қандай фикрда?
