Madaniy meros agentligida yangi tayinlov amalga oshirildi

Hukumat qaroriga muvofiq, Najimov Elmurod Iqboljon o‘g‘li endilikda O‘zbekiston Madaniy meros agentligi direktorining birinchi o‘rinbosari sifatida faoliyat olib boradi. Uning mazkur lavozimga tayinlanishi agentlik faoliyatini yanada samarali tashkil etish, madaniy meros obektlarini muhofaza qilish, asrab-avaylash va kelajak avlodga yetkazish borasidagi ishlar izchil davom ettirilishini ta’minlashga qaratilgani bilan ahamiyatlidir.

Mazkur tayinlov munosabati bilan ushbu lavozimda faoliyat yuritib kelgan Qo‘ziyev Tursunali Karimjonovich boshqa ishga o‘tishi sababli egallab turgan vazifasidan ozod etildi. Uning agentlik tizimidagi faoliyati davomida sohani rivojlantirish, madaniy meros obektlarini saqlash va targ‘ib qilish yo‘lida muayyan ishlar amalga oshirilgani ta’kidlanmoqda.

Madaniy meros agentligi mamlakat hududida joylashgan tarixiy obidalar, arxeologik yodgorliklar, ziyoratgohlar, muzeylar va boshqa madaniy boyliklarni muhofaza qilish, ulardan oqilona foydalanish va xalqaro miqyosda targ‘ib etish kabi muhim vazifalarni amalga oshiradi. 

Shu ma’noda, agentlik rahbariyatidagi bu kabi tayinlovlar sohadagi islohotlarni yanada jadallashtirish, boshqaruv samaradorligini oshirish hamda milliy madaniy merosni asrash borasidagi ustuvor yo‘nalishlarni izchil davom ettirishda muhim ahamiyat kasb etadi.