«Ayrim qonun hujjatlariga o‘zgartirish va qo‘shimchalar kiritish to‘g‘risida»gi qonun (O‘RQ–1160-son, 2026 yil 23 iyul) bilan madaniy meros sohasidagi davlat boshqaruvini takomillashtirishga qaratilgan qator normalar joriy etildi.
Qonunga muvofiq, respublika ijro etuvchi hokimiyat organlarining madaniy meros ob’yektlarini muhofaza qilish va ulardan foydalanish sohasidagi vakolatlari aniqlashtirildi.
Kiritilgan qo‘shimchalarga ko‘ra, Madaniy meros agentligi moddiy madaniy meros ob’yektlarini muhofaza qilish va ulardan foydalanish to‘g‘risidagi qonunchilikka rioya etilishi ustidan davlat nazoratini amalga oshiradi.
Shuningdek, agentlik madaniy meros ob’yektlarini muhofaza qilish, asrash, targ‘ib qilish va ulardan foydalanishga oid davlat dasturlarini ishlab chiqish hamda amalga oshirishda ishtirok etadi.
Yangi vakolatlar doirasida moddiy madaniy meros ob’yektlarini aniqlash, hisobga olish, muhofaza qilish, targ‘ib etish va ulardan samarali foydalanishni ta’minlash ham agentlik zimmasiga yuklatildi.
Bundan tashqari, Madaniy meros agentligi moddiy madaniy meros ob’yektlarining tarixiy-madaniy ekspertizasini tashkil etish va o‘tkazish vakolatiga ham ega bo‘ldi.
Qonun rasmiy e’lon qilingan kundan e’tiboran kuchga kirdi.
