Dunyodagi eng yirik kompaniyalardan biri sun’iy intellekt sababli 30 ming xodimini ishdan bo‘shatdi

Amerikaning Oracle korporatsiyasi sun’iy intellektga o‘tish doirasida 30 ming nafar xodimini ishdan bo‘shatdi, deb yozadi Time.

Kompaniyada 30 yil ishlagan xodimlardan biri ishdan bo‘shatilganini shifoxonada yotgan paytida telefon orqali bilgan. 

Sobiq xodimlarning aytishlaricha, ularni sun’iy intellekt tizimlarini takomillashtirishga majburlashgan. 

17 aprel kuni 600 nafar xodim ta’til pullarini oshirish, tibbiy sug‘urtani uzaytirish va ishchi vizasiga ega xodimlarni qo‘llab-quvvatlashini so‘rab rahbariyatga maktub yozgan. Oracle murojaatlarni faqat individual tarzda ko‘rib chiqishini bildirgan.

Ayniqsa xorijlik ishchilarga qiyin bo‘lishi aytilmoqda. Ularning yangi ishxona topish uchun 60 kun vaqti bor, aks holda AQShni tark etishlariga to‘g‘ri keladi.

Oracle — dasturiy ta’minot ishlab chiquvchi kompaniya bo‘lib, Microsoft’dan keyin ikkinchi o‘rinda, axborot texnologiyalari sohasida to‘rtinchi o‘rinda turadi (Alphabet, Microsoft va IBM korporatsiyalaridan keyin). 2025 yil holatiga dunyo bo‘yicha uning xodimlari soni 162 ming nafarni tashkil etgan.