Epshteynning o‘limidan oldingi ehtimoliy xati surati e’lon qilindi

AQSh sudi moliyachi va odam savdosida ayblangan Jyeffri Epshteynning 2019 yil iyul oyida o‘z joniga qasd qilishdan oldin yozib qoldirgan xatining fotosuratini e’lon qildi. Hujjat shu hafta The New York Times so‘roviga ko‘ra oshkor qilindi.

Topilgan qog‘oz varag‘ida qo‘lda yozilgan quyidagi jumlalar bor:

«Bir necha oylik tergov davomida hech qanday muhim narsa topilmaganiga ishona olmayman. Men shokdaman».

Matn ostida imzo yo‘q. Xatni Epshteynning kameradoshi, sobiq politsiyachi Nikolas Tartalione topib olgan. O‘tkazilgan xatshunoslik ekspertizasi moliyachining dastxatiga yuqori darajada o‘xshashlikni tasdiqladi.

Voqealar xronologiyasi:

2019 yil 23 iyul — Epshteyn kamerada bo‘ynidagi jarohatlar bilan hushsiz holda topildi. Bu voqea uni Tartalione bilan bir kameraga joylashtirishganidan bir necha kun keyin sodir bo‘ldi.

Voqeadan so‘ng, u o‘z joniga qasd qilishning oldini olish bo‘yicha maxsus protokolga o‘tkazilgan, biroq keyinchalik yana oddiy sharoitga qaytarilgan.

2019 yil 10 avgust - Epshteyn Nyu-Yorkdagi qamoqxona kamerasida o‘lik holda topildi. O‘limning rasmiy sababi - o‘zini osish orqali o‘z joniga qasd qilish.

Xat birinchi marta 2026 yil 30 aprelda The New York Times gazetasida e’lon qilinganidan keyin ommaga ma’lum bo‘ldi. Sud jurnalistlarning hujjatni oshkor qilish haqidagi so‘rovini qanoatlantirdi.

AQSh Adliya vazirligi va qamoqxona vakillari hozircha e’lon qilingan xat yuzasidan rasmiy izoh bermadi.

Bu topilma so‘nggi o‘n yilliklardagi eng shov-shuvli ishlardan biriga yana e’tibor qaratdi va Epshteynning federal hibsxonadagi sharoitlari haqida yangi savollarni keltirib chiqardi.