Livanda Isroil zarbasi oqibatida o‘nlab kishilar halok bo‘ldi

Isroilning so‘nggi aviazarbalarining aksar qismi Livan janubi bo‘ylab berilgan. Isroillik harbiylar Eron tomonidan qo‘llanadigan qurolli guruhlarga aloqador infratuzilmalar va shaxslarni o‘qqa tutganini aytmoqda.

AQSh prezidenti Donald Tramp 16 aprel kuni Isroil va Livan hukumatlari o‘rtasida otashkesim bo‘yicha kelishuv tuzilganini e’lon qilganiga qaramay, Isroil va «Hizbulloh» o‘rtasida zarbalar almashinuvi to‘xtamayapti.

Tomonlar bir-birini sulhni buzishda ayblamoqda.

Livan sog‘liqni saqlash vazirligiga ko‘ra, eng jiddiy zarbalar mamlakat janubida joylashgan Sayda shahri yaqinidagi Ayn-ed-Delb tumaniga to‘g‘ri kelgan, bu yerda turar joy binosi vayron bo‘lib, o‘nlab kishilar xarobalar ostida qolgan.

«Hizbulloh» isroilliklarning so‘nggi zarbalariga javoban Isroil shimoli bo‘ylab dronlar hujumini amalga oshirdi. Shuningdek, Isroil qo‘shinlarining Livan janubidagi pozitsiyalari o‘qqa tutilgan. Isroil harbiylari xabar qilishicha, buning oqibatida uch nafar isroillik askar yaralangan.

Mojaroning yangi bosqichi

Isroil va «Hizbulloh» o‘rtasida 2024 yil noyabrida o‘t ochishni to‘xtatish haqida kelishuv tuzilib, mojaroning oldingi bosqichi yakunlangandi. Lekin shundan keyin ham Isroil vaqti-vaqti bilan «Hizbulloh»ga aloqador nishonlar bo‘ylab zarbalar berib turdi.

AQSh va Isroil 28 fevral kuni Eronga hujum qilib, mamlakat rahbariyati vakillarini o‘ldirishi ortidan 2 mart kuni «Hizbulloh»Isroil bo‘ylab raketa va dronlar uchirdi.

Bunga javoban Isroil Livan bo‘ylab yopirilma zarbalar yo‘llashga kirishdi. Mart oyi boshida Isroil qo‘shini yana quruqlik orqali Livan janubiga kirib, aholi yashash manzillarini vayron qildi hamda Livan ichkarisiga 10 kilometr masofadagi hududlarni o‘z nazoratiga oldi.

Isroil rasmiylariga ko‘ra, ushbu amaliyotdan ko‘zlangan maqsad Isroilning shimoliy hududlarini himoya qilish uchun «Hizbulloh»dan xoli bo‘lgan xavfsizlik zonasini yaratishdir.

Bu hududlarda Isroil armiyasining G‘azodagi harakatlarini eslatuvchi usullar bilan butun boshli qishloqlar vayron qilingan.

Inson huquqlari tashkilotlari ayrim holatlar harbiy jinoyatlar ta’rifiga tushishi mumkinligini ta’kidlamoqda.

Livan sog‘liqni saqlash vazirligi ma’lum qilishicha, so‘nggi hafta mobaynida Isroil hujumlari oqibatida butun mamlakat bo‘ylab 120 dan ortiq kishi halok bo‘lgan, qurbonlar orasida ayollar va bolalar ham bor. Vazirlik qurbonlarni harbiylar va tinch aholi vakillariga ajratmagan.

Mahalliy rasmiylar ma’lumotiga ko‘ra, Isroil va «Hizbulloh» o‘rtasida mart oyi boshida to‘qnashuvlar qayta boshlanganidan buyon Livanda 2 795 kishi halok bo‘ldi.

O‘z navbatida, Isroil Livan janubidagi harbiy harakatlar vaqtida 17 askaridan ayrilgan, shuningdek, Isroil shimoliga yo‘llangan zarbalar oqibatida tinch aholi vakillaridan ikki kishi halok bo‘lgan.