Soliq organlari plastik karta orqali tushumlarni o‘rganmoqda

O‘zbekistonda yashirin iqtisodiyotni qisqartirish va soliq tizimida shaffoflikni ta’minlash maqsadida savdo sohasidagi ayrim P2P - plastik kartadan plastik kartaga pul o‘tkazmalari tahlil qilinmoqda. Soliq qo‘mitasining ma’lum qilishicha, bu jarayon iqtisodiy adolatni ta’minlash va qonun doirasida faoliyat yuritayotgan tadbirkorlarni qo‘llab-quvvatlashga qaratilgan.

Foto: Kun.uz

Qayd etilishicha, yashirin iqtisodiyotni qisqartirish va soliq organlari faoliyati samaradorligini oshirish bo‘yicha choralar amalga oshirilmoqda.

Soliq organlari tomonidan savdo faoliyati bilan shug‘ullanuvchi ayrim xo‘jalik sub’yektlarida to‘lovlar P2P o‘tkazmalari orqali qabul qilinib, ba’zi holatlarda ushbu mablag‘lar soliq hisobotlarida aks ettirilmayotgani tahlil qilinmoqda.

Natijada davlat budjetiga tushishi lozim bo‘lgan ayrim soliq tushumlari to‘liq shakllanmay qolayotgani qayd etilgan.

Shu munosabat bilan yuridik shaxslarda ishlovchi rahbar xodimlarning bank kartalariga kelib tushgan mablag‘lar bo‘yicha tahliliy o‘rganishlar olib borilmoqda.

Aniqlangan holatlar asosida soliq hisobotlarida ko‘rsatilmagan daromadlar bo‘yicha tegishli choralar ko‘rilib, soliq to‘lovchilarga xabarnomalar yuborilmoqda.

Soliq organlari ta’kidlashicha, bu jarayon jazolash yoki bosim o‘tkazish emas, balki yashirin aylanmalarni qisqartirish, halol raqobat muhitini yaratish va qonun doirasida ishlayotgan tadbirkorlarni qo‘llab-quvvatlashga qaratilgan.

Shuningdek, tadbirkorlik sub’yektlari savdo tushumlarini to‘liq rasmiylashtirish va soliq hisobotlarida haqqoniy aks ettirishga chaqirilgan.