Germaniya Kanadaga suvosti kemalarini taklif qilmoqda

Pistorius Ottavada bo‘lib o‘tgan CANSEC qurollanish va xavfsizlik konferensiyasida ishtirok etdi. Dpa agentligi ma’lumotiga ko‘ra, Germaniya mudofaa vaziri Kanada tomonini nemis suvosti kemalarini xarid qilishga qiziqtirishga harakat qilgan.

Kanada bosh vaziri Mark Karni mamlakat iyun oyi oxiriga qadar suvosti kemalarini sotib olish bo‘yicha ko‘p milliardli shartnoma yuzasidan qaror qabul qilishini ma’lum qildi.

Buyurtma uchun Thyssenkrupp kompaniyasining TKMS Canada shu’ba korxonasi kurashmoqda. Kompaniya Norvegiya bilan 212 CD rusumidagi yangi suvosti kemalarini qurish bo‘yicha hamkorlikni yo‘lga qo‘ygan va ushbu loyihani Kanadaga ham kengaytirishni rejalashtirmoqda.

Pistoriusning ta’kidlashicha, Germaniya va Kanada Shimoliy Atlantika, Arktika hamda Uzoq Shimol hududlarida xavfsizlikni birgalikda ta’minlashni maqsad qilgan.

Uning so‘zlariga ko‘ra, 12 ta suvosti kemasini qurish minglab yangi ish o‘rinlari yaratishi mumkin. Shuningdek, loyiha NATO uchun ham muhim strategik aktivga aylanishi ta’kidlangan.

Xabarda aytilishicha, Kanada hukumati shu bilan bir vaqtda Shvetsiyaning Saab GlobalEye razvedka samolyotlarini sotib olish bo‘yicha muzokaralarni ham boshlagan. Germaniya ham ushbu samolyotlarni xarid qilish imkoniyatini ko‘rib chiqmoqda.

Kanada, Germaniya, Norvegiya va Daniya “Dengiz xavfsizligi bo‘yicha hamkorlik” tashabbusi doirasida hamkorlik qilib kelmoqda.