Kosovodagi harbiy jinoyatlar boʻyicha maxsus tribunal 16-sentabr kuni Kosovo ozodlik armiyasining (KOA) sobiq rahbari va qisman tan olingan respublikaning sobiq prezidenti, 58 yoshli Hashim Tachini 25 yilga ozodlikdan mahrum qildi. Bu haqda Reuters xabar berdi. U urush jinoyatlarida, jumladan, qotillik, qiynoqqa solish va noqonuniy hibsda saqlashda aybdor deb topildi.
1990-yillarning oxirida mintaqaning Serbiyadan mustaqilligi uchun kurashgan Kosovo ozodlik armiyasining yana uch nafar sobiq rahbari - Kadri Veseli, Rejep Selimi va Yakup Krasnichi bilan birga sudlanayotgan Kosovoning sobiq prezidenti harbiy jinoyatlarda aybdor deb topilib, 25 yilga ozodlikdan mahrum etildi. Haaga sudi Tachi KOA qoʻmondoni sifatida, xususan, Kosovo kuchlari Serbiya bilan hamkorlik qilishda gumon qilgan 96 nafar siyosiy raqib va shaxslarning oʻldirilishi uchun javobgar ekanini belgiladi.
Hukmni oʻqib eshittirgan sudyaning soʻzlariga koʻra, Kosovoning sobiq prezidenti harbiy jinoyatlarni ragʻbatlantirish uchun «oʻz mavqei, yetakchiligi, hokimiyati va obroʻsidan foydalangan». Siyosatchi oʻz aybini tan olmadi.
Tachi Kosovoning mustaqillik uchun kurashida asosiy rollardan birini oʻynagan. Harbiy oʻtmishidan tashqari, u qisman tan olingan respublikaning bosh vaziri, tashqi ishlar vaziri lavozimlarida ishlagan, shuningdek, 2016-2020 yillarda Kosovo prezidenti boʻlgan. 2020-yilda Tachi Haaga sudi unga nisbatan 1998-1999 yillardagi urush jinoyatlari boʻyicha ayblovni tasdiqlaganidan soʻng prezidentlikdan isteʼfoga chiqdi. Kosovoning sobiq rahbari Haagaga oʻz ixtiyori bilan bordi.
The Insider nashrining yozishicha, Kosovo albanlari va serblari oʻrtasidagi ziddiyatlarning keskinlashuvi 1989-yilda, Belgrad mintaqaning keng avtonomiyasini bekor qilganida va albanlar davlat idoralari hamda politsiyadan ommaviy ravishda ishdan boʻshatilganida sodir boʻlgan. Bir necha yillik zoʻravonliksiz qarshilikdan soʻng, tashabbus Kosovo ozodlik armiyasiga oʻtdi, u 1996-yildan boshlab politsiya uchastkalari, serb tinch aholisi va alban «hamkorlari»ga hujum qila boshladi - oʻshanda AQSH maxsus vakili Robert Gelbard KOAni «hech shubhasiz terrorchi guruh» deb atagan va keyinchalik Haaga tribunali Lapushnik lagerida asirlarni qiynoqqa solgani va oʻldirgani uchun lager qoʻriqchisini qamoqqa hukm qilgan edi.
Belgrad bunga jazo operatsiyalari bilan javob berdi: 1998-yilda Drenitsadagi KOA tayanch punktlariga qilingan hujum oqibatida oʻnlab odamlar, jumladan, ayollar va bolalar halok boʻldi, keng koʻlamli urush boshlanib, yuz minglab albanlar qochqinga aylandi.
