Jo‘rabek Mirzamahmudov O‘zbekiston energetika vaziri lavozimidan ozod qilindi. Bu haqda prezidentning tegishli farmoni qabul qilindi.
U salomatligi tufayli energetika vaziri lavozimidan ozod etilgan Alisher Sultonovning o‘rnini egallab, 2022 yil sentyabridan beri idoraga rahbarlik qilib kelayotgandi.
Jo‘rabek Mirzamahmudov 1979 yilda Namangan viloyatida tug‘ilgan. 2001 yil AQShdagi Alabama universitetini, 2005 yil Toshkent kimyo-texnologiyalar institutini tamomlagan.
2006-2012 yillarda «O‘zbekneftgaz»da turli lavozimlarda ishlagan, 2012-2014 yillarda iqtisodiyot vaziri o‘rinbosari, 2014-2017 yillarda «O‘zkimyosanoat» raisi o‘rinbosari bo‘lgan, 2017-2018 yillarda Vazirlar Mahkamasida departament mudiri lavozimida ishlagan, 2018-2019 yillarda Vazirlar Mahkamasi huzuridagi Atom energetikasini rivojlantirish agentligi bosh direktori, 2019 yildan «O‘zatom» agentligi bosh direktori bo‘lgan. 2019-2020 yillarda energetika vaziri o‘rinbosari lavozimida faoliyat ko‘rsatgan, 2020 yil yanvarida «O‘zkimyosanoat» AJ boshqaruvi raisi lavozimiga tayinlangandi.
Prezidentning tegishli farmoni bilan Sherzod Xo‘jayev energetika vaziri etib tayinlandi.
