Suv xo‘jaligidagi korrupsiya davlatga 70 mlrd so‘mdan ortiq zarar yetkazgan

So‘nggi ikki yarim yilda suv xo‘jaligi tizimida 243 ta korrupsiyaviy jinoyat sodir etilgan bo‘lib, ularda 301 nafar xodim ishtirok etgan. Oqibatda davlat va jamiyat manfaatlariga 70 mlrd so‘mdan ortiq zarar yetkazilgani ma’lum qilindi.

26 iyun kuni Suv xo‘jaligi vazirligida Korrupsiyaga qarshi kurashish milliy kengashining sayyor majlisi bo‘lib o‘tdi. Majlisga Oliy Majlis Senati raisi, Korrupsiyaga qarshi kurashish milliy kengashi raisi Tanzila Norboyeva raislik qildi.

Yig‘ilishda suv xo‘jaligi tizimida korrupsiyaning oldini olish, davlat mablag‘laridan samarali foydalanish, sohani raqamlashtirish, manfaatlar to‘qnashuvini bartaraf etish hamda ochiqlik va shaffoflikni ta’minlash masalalari tanqidiy muhokama qilindi.

Ta’kidlanishicha, 2024–2025 yillar hamda joriy yilning o‘tgan davrida suv xo‘jaligi tizimida 301 nafar xodim tomonidan 243 ta korrupsiyaviy jinoyat sodir etilgan. Bu qonunbuzarliklar natijasida davlat va jamiyat manfaatlariga 70 milliard so‘mdan ortiq moddiy zarar yetkazilgan.

Muhokama davomida budjet mablag‘larini talon-toroj qilish, suv tejovchi texnologiyalar uchun ajratilgan subsidiyalardan noqonuniy foydalanish, suv fondi yerlarini boshqarishdagi qonunbuzarliklar, raqamlashtirish ishlarining sustligi va manfaatlar to‘qnashuvi bilan bog‘liq holatlarga alohida e’tibor qaratildi.

Xususan, sohada joriy etilgan «Aqlli suv» qurilmalarining katta qismi haligacha to‘liq samarali ishlamayotgani tanqid qilindi.

Majlisda korrupsiyaga qarshi kurashishda asosiy e’tibor alohida huquqbuzarliklarni aniqlashga emas, balki ularning kelib chiqishiga sabab bo‘layotgan omillar va shart-sharoitlarni bartaraf etishga qaratilishi lozimligi ta’kidlandi.

Yig‘ilish yakunida Suv xo‘jaligi vazirligi va Korrupsiyaga qarshi kurashish agentligiga bildirilgan takliflar asosida 10 kun muddat ichida sohadagi korrupsiyaviy xavf-xatarlarni bartaraf etishga qaratilgan «yo‘l xaritasi»ni ishlab chiqish hamda uni Korrupsiyaga qarshi kurashish milliy kengashiga kiritish vazifasi yuklatildi.