JCh-2026 anonsi. Favoritlar pley-offni boshlamoqda

29-30 iyun kunlari jahon chempionati 1/16 bosqichi doirasida Braziliya-Yaponiya, Germaniya-Paragvay va Niderlandiya-Marokash juftliklari ishtirokidagi o‘yinlar bo‘lib o‘tadi.

Braziliya – Yaponiya
29 iyun, 22:00. NRG Stadium, Hyuston

2025 yil oktyabrida Braziliya o‘rtoqlik o‘yinida Yaponiyaga 2:3 hisobida yutqazib qo‘ygandi, holbuki pentakampeonlar o‘yinning birinchi bo‘limidan keyin 2:0 hisobida oldinda borayotgandi. Shunday ekan, Hadzime Moriyasu jamoasiga past baho bermaslik kerak – bu jamoa guruh bosqichida Niderlandiya va Shvetsiya bilan tengma-teng kurashdi, shuningdek, Tunisni yirik hisobda mag‘lub etdi.

Shu bilan birga, bu safar yaponlarga o‘tgan yilgi o‘sha o‘yinda qatnashgan yetakchi futbolchilardan bir qanchasi safda emas – Mitoma ham, Kubo ham, Endo va Minamino ham maydonga tusha olmaydi. Lekin Ayase Ueda va Daichi Kamada yuqori sport formasini namoyish etmoqda. Ular himoya chizig‘ini ancha oldinga chiqaradigan braziliyaliklar mudofaasi ortida yuzaga keladigan bo‘shliqlardan foydalanishi mumkin.

Karlo Anchelotti shogirdlari guruh bosqichi startidayoq qiyinchilikka duch kelishgandi, ammo Marokash bilan o‘yindagi durangdan keyin jamoa o‘ziga keldi va keyingi ikki o‘yinda ham ishonchli g‘alabalarga erishdi. Vinisius allaqachon to‘rtta gol urdi, yana uchta gol Mateus Kunya hisobiga yozildi. Qolaversa, turnirning muhim qismida o‘zining nostandart qarorlari bilan jamoaga yordam berishi mumkin bo‘lgan Neymar safga qaytgan. Ammo Braziliya yarimhimoyasida muammolar ko‘zga tashlanmoqda, Kazemironing yoshi o‘tgani sezilmoqda. Oldindagi o‘yin kartinasi qanday ko‘rinishda bo‘lishini taxmin qilish oson – «selesao» o‘yinning ko‘p vaqti davomida to‘pga egalik qiladi, yaponiyaliklar esa o‘z omadini qarshi hujumlardan izlaydi. Turnirning birinchi turida marokashliklar aynan tezkor qarshi hujum orqali brazillarni ojiz qoldirishgandi. Qolaversa, keyingi turlardagi raqiblar – Shotlandiya va Haiti yetarli darajada qarshilik ko‘rsatadigan jamoalar bo‘lmaganini hisobga olish kerak.

Agar Yaponiya to‘sig‘idan o‘tilsa, pentakampeonlarni Norvegiya va Kot-d'Ivuar juftligi g‘olibi kutadi, chorakfinaldagi ehtimoliy raqib Angliya bo‘ladi, jamoa yarimfinalgacha yetib boradigan bo‘lsa, katta ehtimol bilan, Argentinaga qarshi o‘ynaydi. Shunday ekan, yaqin haftada shu savolga javob topilishi kerak: Braziliya uzoq cho‘zilgan inqirozdan chiqa oladimi?

Germaniya – Paragvay
30 iyun, 01:30. Gillette Stadium, Foksboro

Germaniya o‘z guruhida g‘olib chiqdi va so‘nggi uch mundialda ilk bor pley-offga yo‘l oldi, ammo Nagelsmann jamoasining o‘yiniga savollar bor. Bundan tashqari, jamoaning asosiy himoyachilaridan biri, himoyada ham, hujumda ham birdek yordam bera oladigan Shlotterbek jarohat olib safdan chiqdi, uning o‘rnini bosa oladigan futbolchi tarkibda yo‘q. Ammo undan ham yomonrog‘i – hujum chizig‘i oqsamoqda. Jamoaning asosiy to‘purari – zaxira futbolchisi sifatida turnirga olib ketilgan Deniz Undav bo‘lib turgani ham ko‘p narsadan darak beradi, Havers, Virs va Musiala kabi futbolchilar esa o‘z imkoniyatlari darajasida o‘ynay olmayapti.

Paragvay o‘z guruhidan uchinchi o‘rin bilan chiqqan, ammo janubiy amerikaliklar osonlikcha taslim bo‘lmoqchi emas. Paragvayliklar dastlabki turda AQShdan 1:4 hisobida mag‘lub bo‘lganidan keyin o‘ziga keldi va keyingi ikki o‘yinda darvozasi daxlsizligini saqlab qoldi. Saralash bosqichida esa jamoa 18 o‘yinda jami 10 ta gol o‘tkazgan va bu Janubiy Amerikada Ekvadordan keyingi ikkinchi yaxshi natija bo‘lgandi. Bu jamoa kerak bo‘lganda o‘yin tempini tushirib, sabr bilan hisobni ushlay oladi. Kubas, Gomes va Alderetedan iborat himoya uchligi ancha ishonchli ko‘rinmoqda va bu himoya devorini yorib o‘tish uchun raqibdan yangicha narsa o‘ylab topish talab qilinadi.

Nemislar bu juftlikda favorit, ammo jamoa o‘z o‘yinini kuchaytirishi kerak bo‘ladi, chunki 1/8 finalda Fransiya bilan o‘yin kutayotgan bo‘lishi mumkin. Agar bu ikki jamoa to‘sig‘idan ham o‘tilsa, chorakfinalda, katta ehtimol bilan, Niderlandiya kutayotgan bo‘ladi. Parallel yo‘nalishda esa Ispaniya harakatlanadi, agar Germaniya muvaffaqiyatli yurishda davom etadigan bo‘lsa, yarimfinalda aynan shu jamoa bilan o‘ynashi mumkin. Qisqasini aytganda, jamoa tez fursatda o‘z maksimumiga chiqishi talab etiladi.

Niderlandiya – Marokash
30 iyun, 06:00. Estadio BBVA, Guadalupe

Ronald Kuman allaqachon Niderlandiyani ushbu juftlikda favorit deb bilmasligini aytdi. Uni to‘g‘ri tushunish mumkin – uning shogirdlari guruh bosqichida ko‘p gol urishdi, ammo qatorasiga yetti o‘yinda darvoza daxlsizligini saqlay olmayapti, Kumanning o‘zi bir necha bor o‘tish bosqichlaridagi ixchamlik va tezlikda muammolar borligini qayd etgan.

Niderlandiya hujumda urg‘uni qanotlarga qaratmoqda, Dumfris va Gakpo asosiy ijrochilar. Ammo muammo shundaki, Marokash qanot himoyasida jahon miqyosidagi yulduz futbolchilar – Hakimi va Mazraviy harakat qiladi. Umuman, shunday hissiyot borki, bu o‘yinda barchasi aynan shu zonalarda hal bo‘ladi. Muxlislarni gollarga boy yorqin o‘yin kutayotganini taxmin qilish mumkin, ikki jamoa ham ochiq o‘yin namoyish etadi.

O‘yindagi yana bir intriga marokashliklar forvardi Saybari bilan bog‘liq, u guruh bosqichidagi har bir o‘yinda gol urdi. Shu yozda «Bavariya» safiga o‘tayotgan bu hujumchi seriyasini davom ettiradimi? Uning tezligi niderlandlarning sekin harakatlanuvchi va ba’zida qo‘pol xatolarga yo‘l qo‘yadigan himoyachilari uchun ulkan muammoga aylanishi mumkin.

Shu bilan birga, ushbu juftlik g‘olibiga 1/8 finalda osonroq raqib tushadi – JAR bilan o‘yinda qiyinchilikka uchragan va faqat so‘nggi daqiqalarda urilgan gol evaziga keyingi bosqichga o‘tgan Kanada. Shunday ekan, g‘olib jamoada kamida chorakfinalgacha borish uchun yaxshi imkoniyat hosil bo‘ladi, u yerda esa g‘olibni Germaniya yoki Fransiya kutishi ehtimoli yuqori.