Миллий жамоалар иштирокидаги йирик турнирлар азалдан кўплаб янги юлдузларни кашф қилади, мавсум давомида очилган ёш футболчилар янада танилади. Кўпинча жаҳон чемпионати ёш футболчи трансферида катализатор вазифасини ўтайди – клублар бўлажак топ футболчини имкон қадар тезроқ ўзиники қилишга уринади. Бу сафар ҳам шундай бўлди – турнирнинг айрим юлдузлари аллақачон ўзига янги клуб топди. Швейцария сафида порлаган Жоан Манзамби «Астон Вилла» аъзосига ўтди, Исмаэл Сайбари энди «Бавария»да, Морган Роджерс эса фаолиятини «Челси»да давом эттирадиган бўлди.
Қуйида ЖЧ қаҳрамонлари ва кашфиётлари бўлган бошқа футболчилардан қайсидари ёзда клубини ўзгартиришга яқин экани ҳақида.
Ян Диоманде
19 ёш, «Лейпциг», ўнг қанот вингери
Трансфер қиймати – 90 миллион евро (Transfermarkt бўйича)
Дунёнинг энг яхши дриблерларидан бири ЖЧ-2026 ўйинларида ҳам ўз даражасини намойиш этди. У фақат гуруҳ босқичида Кюрасаога қарши ўйинда голли ҳаракат амалга оширди, аммо XXI асрда жаҳон чемпионатидаги дастлабки уч ўйинида 10 дан ортиқ муваффақиятли алдаб ўтиш ва 10 дан ортиқ вазият яратишга эришган илк футболчига айланди.
Июн ойи ўрталарига қадар Ян «Ливерпул»га ўтишга яқин турганди. Мерсисайдликлар Муҳаммад Салоҳ ўрнига ўнг қанот вингери изламоқда ва бу позиция учун 100 миллион евродан ортиқ маблағ сарфлашга тайёр. Аммо ой охирига келиб вазият ўзгарди. Энди «ПСЖ» ҳам футболчи учун курашга қўшилган, франциялик инсайдер Жамелнинг маълумотига кўра, вингер Париж клубига ўтиш учун оғзаки розилик билдирган – у Луис Энрике қўл остида ўйнашни хоҳламоқда ва Парижда «Олтин тўп» учун курашиш имконига эга бўлишига ишонмоқда.
Диомандега «Арсенал» клубидан ҳам қизиқиш бор, аммо лондонликлар бош мураббийи Микел Артета ушбу футболчидан чап қанотда фойдаланмоқчи бўлган, футболчининг ўзи эса, ҳар икки оёғида бирдек ҳаракатлана олса-да, ўнг қанотда ўйнашни истамоқда. «Арсенал»да эса ҳужумнинг ўнг қаноти жамоа етакчиларидан бири Букайо Сака томонидан банд этилган.
Айюб Буадди
18 ёш, «Лилл», марказий яримҳимоячи
Трансфер қиймати – 50 миллион евро
Ақлли ва қора меҳнатдан қочмайдиган ҳавбек. Майдон марказида кучли босим остида ҳам ўзини хотиржам тутиши, энг тўғри қарорларни қабул қилиши ва ўзига ишонч билан ҳаракат қилиши орқали ҳайрон қолдира олади. Ва у ҳали 18 ёшда.
У ЖЧ 1-турида Бразилияга қарши ўйинда майдон марказида ҳукмронлик қилди: тўрт марта тўпни олиб қўйди, олти марта тўпни жамоага қайтарди ва рақибларни уч марта муваффақиятли алдаб ўтди. Узатмалар аниқлиги – 91 фоиз. Канада, Нидерландия ва Шотландияга қарши ўйинларда ҳам жамоасининг энг яхшиларидан бўлди.
Унга Англиянинг қатор грандлари талабгор. «Ливерпул» ва «Арсенал» вакиллари марокашлик футболчининг вакиллари билан учрашув ўтказган, «МЮ» скаутлари ҳам Айюбнинг ЖЧдаги ўйинларини кузатган, франциялик журналист Маттео Моретто ва Англиянинг The Athletic нашри ёзишича, Буаддини қўлга киритиш учун энг яхши имконият «Манчестер Сити»да. «Шаҳарликлар» Эллиот Андерсон трансферидан кейин майдон маркази учун яна бир қимматбаҳо харидни амалга оширишга тайёр.
Африкалик яримҳимоячига Мадриднинг «Реал» клубидан ҳам қизиқиш бор. Ушбу клуб скаутлари ҳам Буаддини кузатиш учун Бразилия ва Марокаш ўртасидаги ўйинга тушишган ва клуб Энцо Фернандес бўйича музокаралар муваффақиятсиз якунланадиган бўлса, айнан унга эътибор қаратмоқчи. «Лилл» эса бу футболчиси учун 100 миллион евро ишлаб олишни кўзлаган.
Ману Коне
25 ёш, «Рома», марказий яримҳимоячи
Трансфер қиймати – 50 миллион евро
Ману ҳам турнирни яхши ўтказди. У тўрт ўйинда (Ироқ, Норвегия, Парагвай ва Марокаш билан ўйинларда) бошланғич таркибда тушди, яримфиналда Испанияга қарши ўйиннинг иккинчи бўлимида туширилди. У бу ўйинларда юлдузли жамоадошлари фонида йўқолиб қолмади ва майдон марказида Адриен Рабио билан жуфтликда мустаҳкам қалқон ташкил этди: 92 фоиз аниқликдаги узатмалар, етти марта тўпни олиб қўйди, 7 марта фол ишлади ва 25 марта тўпни эгаллаб олди.
Италиядаги Tuttosport газетаси у ҳақда шундай ёзди: «Рома» Конени 60 миллион евро атрофидаги маблағ эвазига қўйиб юборишга тайёр. Ушбу французга Андрей Сантосдан кейин яримҳимоя чизиғи учун яна бир трансфер амалга оширишни режалаштираётган «МЮ» асосий даъвогар бўлиб турибди. Фабрицио Романонинг қўшимча қилишича, инглизлар клуби аллақачон футболчи билан алоқага чиққан ва шартнома жиҳатларини муҳокама қилган.
Крисенсио Саммервилл
24 ёш, «Вест Ҳэм», чап қанот вингери
Трансфер қиймати – 35 миллион евро
Крисенсио Саммервилл Нидерландия жамоасидаги дебютини ЖЧ бошланишига саккиз кун қолганида амалга ошириб, Жазоир ва Ўзбекистонга қарши ўртоқлик ўйинларида ўйнади. ЖЧнинг 1-турида японлар дарвозасига жуда чиройли гол урди, иккинчи турда Швецияга қарши ўйинда Роналд Куман уни захирада қолдирди, аммо иккинчи бўлимда тушган футболчи бир гол ва бир голли узатма муаллифига айланди. Плей-оффда эса Марокашга қарши ўйинда Коди Гакпонин ҳисобни тенглаштирувчи голига узатма берди, аммо пеналтилар сериясида ҳал қилувчи зарбани амалга ошира олмади.
Шунга қарамай, турнир давомида унга қизиқиш ортиб кетди: уни қўлга киритишга АПЛнинг «Ливерпул», «МЮ», «Фулҳэм», «Астон Вилла» каби клублари, шунингдек, «Рома» талабгор эди, римликлар 46 миллион евролик таклиф ҳам жўнатганди. Аммо ўтган мавсум якунида чемпионшипга тушиб кетган «Вест Ҳэм» ушбу футболчиси учун катта пул ишлаб олишга қарор қилди ва уни 80 миллион евро эвазига Саудия Арабистонининг «Ал-Ҳилол» клубига сотадиган бўлди.
Андреас Шелдеруп
22 ёш, «Бенфика», чап қанот вингери
Трансфер қиймати – 30 миллион евро
У фақат топ рақиблар билан катта саҳнага чиқади. ЕЧЛнинг ўтган мавсумида у гуруҳ босқичининг сўнгги турида «Реал» дарвозасига икки гол урган ва жамоаси ўтиш ўйинларига ўтишига катта ҳисса қўшганди. ЖЧда эса Франция билан ўйинда захирадан тушиб, норвегларнинг ягона голига ҳаммуаллифлик қилди, плей-оффда Бразилияга қарши ўйинда Ҳоланднинг икки голига ассист берди, Англия билан ўйинда эса ҳисобни очувчи гол муаллифига айланди. Андреас бу турнирдаги бешта ўйиндан фақат иккитасида бошланғич таркибда тушгани инобатга олинса, ажойиб статистика.
Сўнгги уч мавсумни Португалияда (орада ватанидаги «Норшеланн» клубида ижара асосида ҳам ўйнаб келди) ўтказган Шелдеруп кучлироқ клубга ўтиши вақти келган. Бу ёзда катта трансфер кампанияси олиб бораётган «Тоттенҳэм» клубидагилар ҳам шундай фикрда. Португалиядаги нашрлар ёзишича, «шпорлар» ушбу футболчи учун 40 миллион евролик таклиф тайёрламоқда ва бу «Бенфика»ни қаноатлантиради. Шунингдек, Алехандро Гарначони «Астон Вилла»га ижарага берган «Челси» ҳам ушбу норвегиялик ёш футболчини қўлга киритишга уриниб кўриши мумкин.
Жед Спенс
25 ёш, «Тоттенҳэм», ўнг қанот ҳимоячиси
Трансфер қиймати – 30 миллион евро
Томас Туҳел Жедни ҳимоянинг ҳар икки қанотида ўйнатиб кўрди, бундан ташқари, мураббий ҳар ўйинга қанотларга турлича футболчиларни туширди. Натижада «Тоттенҳэм»нинг ушбу футболчиси фақат тўрт ўйинда стартда тушди – шундан биттасида, Аргентинага қарши ўйинда Англия ютқазди, Гана билан ўйинда голсиз дуранг қайд этилди, фақат икки ўйинда ғалаба қозонилди. Аммо ушбу футболчи турнирни муваффақиятли ўтказди, дейиш мумкин – у ўзини дунёга танитди ва ўз коллекциясига ЖЧ бронза медалини қўшиб қўйди.
Лондонликлар Жедни сотишга қарши эмас ва унинг трансферини камида 35 миллион еврога баҳоламоқда. Унга асосий даъвогар ҳозирча «Интер» – Италия нашрларига кўра, Спенс «шпорлар» сафини тарк этишни истамоқда ва миланликлар сафида ўйнашга рози. Шунингдек, унга «Эвертон» ҳам қизиқмоқда, аммо мерсисайдликлар клубида ундан ташқари, Гелой Дуэ ва Бен Уайт вариантлари ҳам бор.
Гилберто Мора
17 ёш, «Тихуана», ҳужумкор яримҳимоячи
Трансфер қиймати – 10 миллион евро
Мексикалик ушбу вундеркинд турнирнинг энг ёш футболчисига айланди, бундан ташқари, жаҳон чемпионатларида ўйнаган энг ёш футболчилар олтилигига кирди. У ЖАРга қарши кечган мундиалнинг очилиш ўйинида 66-дақиқада майдонга тушди ва дарҳол тарихга кирди – 1966 йилдан буён 20 ёшгача бўлган футболчилар орасида ЖЧ ўйинида юз фоизлик аниқликдаги узатмалар берган учинчи футболчи бўлди.
ЖЧ бошланиши арафасида Мора «Тиҳуана» билан шартномасини янгилаганди, аммо бу шунчаки футболчининг трансфер нархини оширишга қаратилган классик айёрлик бўлиши мумкин. Ушбу истеъдодли футболчи учун рақобат жиддий — «Барселона», «Реал» ва Англиянинг қатор клублари мексикалик учун 40 миллион евро тўлашга тайёр. Аммо муҳим нюанс бор: ФИФА қоидаларига кўра, футболчи балоғат ёшига етгунича бошқа лигага трансфер қилиниши мумкин эмас. Море фақат октябрга бориб 18 ёшга тўлади, шунинг учун у билан фақат оғзаки келишувни ҳал қилиш мумкин. Ўз вақтида «Реал» Эндрик трансферида шундай йўл тутганди.
Густаво Пуэрта
22 ёш, «Расинг», марказий яримҳимоячи
Трансфер қиймати – 10 миллион евро
Колумбияликлар янги авлодининг ёрқин намунаси. Пуэрта 2025 йил охиридан буён миллий жамоа сафида ўйнаб келади, аммо айнан мундиалда жамоанинг асосий таркиб футболчисига айланди. Opta маълумотига кўра, Нестор Лоренсо шогирдлари гуруҳ босқичида ўртача бир ўйинда йўлланган зарбалар сони бўйича учинчи энг яхши натижани кўрсатган. Бунда Густавонинг хизматлари катта – ушбу универсал яримҳимоячи ўз жамоаси ҳужумларини ташкил этишда катта ҳажмдаги ишларни бажарди ва том маънода майдоннинг ҳар бир участкасида ишлади. Пуэрта узатмалар аниқлиги бўйича 92 фоизлик кўрсаткичга эришган, унинг рақиб жарима майдонига узатган пасларидан 88,3 фоизи шерикларига аниқ етиб борган. Бундан ташқари, у 94 марта тўп билан олдинга борган, бу борада жамоада иккинчи кўрсаткичга эга. У тўпсиз ҳаракатланишда ҳам ажойиб: прессинг ҳаракатлар бўйича у жамоадаги энг яқин таъқибчисини нақ 61 уринишга ортда қолдирган.
22 ёшли футболчига «Рома», «Лацио», «Порту», «Аталанта» ва «Вилярреал» каби клублар қизиқмоқда. «Расинг» унга 20 миллион евролик нарх белгилаган ва унинг сотувидан яхшигина фойда кўриши мумкин – бир йил олдин аргентиналиклар клуби Густавони «Байер»дан 3,5 миллион евро эвазига харид қилганди.
Ҳессем Ҳассан
24 ёш, «Реал Овиедо», ўнг қанот вингери
Трансфер қиймати – 8 миллион евро
Ҳассан жаҳон чемпионатида атиги 126 дақиқа ўйнади, аммо шунинг ўзи турнир кашфиётларидан бирига айланиши учун кифоя қилди. «Овиедо» вингери гуруҳ ўйинларида майдонга тушмаганди, плей-оффда эса Австралияни пеналтилар сериясида мағлуб этишда ёрдам берди.
Унинг бошланғич таркибдаги илк ўйини – Аргентинага қарши кечди. Ўша ўйинда Ҳассан ўзини дунёга кўз-кўз қила олди: у дадиллик билан юлдуз футболчиларни алдашга киришди, мунтазам равишда рақиб дарвозаси томон хавф солди ва ўйиннинг энг яхши футболчиларидан бири бўлди. Унинг ўз услубида қанот бўйлаб олдинга юришларидан бири Мустафо Зикога голли узатма бериши билан якунланганди, аммо бу гол ҳужум бошланишидаги фол туфайли бу гол бекор қилинди. У кейинроқ барибир ўз мақсадига эришди ва Зикони голли узатма билан таъминлади, аммо мисрликлар ўша ўйинда икки гол устунлигини сақлаб қола олишмади – аргентиналиклар сўнгги 13 дақиқа ичида учта гол уришди ва Мисрни турнирдан чиқариб юборишди.
Ўзига берилган 126 дақиқа мобайнида Ҳассан тўққизта дриблинг амалга оширди – бу ўртача 90 дақиқага 6,4 та дегани. Унинг ёрқин ўйинлари трансфер бозоридаги клубларнинг эътиборини ўзига қаратишни бошлаган: ушбу вингер Шотландиянинг энг номдор клуби «Селтик»ка ўтиши кутилмоқда.
Хулиан Кинионес
29 ёш, «Ал-Қодисия», ҳужумчи
Трансфер қиймати – 14 миллион евро
Деярли бутун фаолиятини Мексикада, асосан «Тигрес» клубида ўтказган ҳужумчи 2024 йилда Саудия чемпионатига келган, ўтган мавсумда ушбу лигада Криштиану Роналдуни ортда қолдириб, 33 гол билан энг яхши тўпурарга айланганди. У ўз ватанида ўтказилган жаҳон чемпионатида ҳам юқори спорт формасида эканини намойиш этди: очилиш ўйинида ЖАР дарвозасига турнирнинг илк голини урди, кейин Чехия, Эквадор (бу ўйинда у битта голли узатма муаллифи ҳам бўлди) ва ҳатто Англия дарвозасини ишғол этди. Энди уни футбол жамоатчилиги тезкор, кучли зарбага эга ва ажойиб дриблинги бор ҳужумчи сифатида танийди. Бешта голли ҳаракат – мексикалик футболчилар орасида 1966 йилдан буён битта жаҳон чемпионатидаги энг юқори кўрсаткич бўлди. Бундай кўрсаткичлари билан 29 ёшда ҳам у кучли чемпионатда ўйнай олиши мумкин.
Возиня
40 ёш, клубсиз, дарвозабон
Трансфер қиймати – 50 минг евро
Кабо-Верде дарвозабонининг бу мундиалдаги саргузаштлари ҳақида кино олса бўлади. 40 ёшли дарвозабон ҳақидаги муҳокамалар Мбаппе ва Ҳоланднинг голлари, Мессининг рекордлари ва Ямалнинг ўйини ҳақидаги муҳокамалардан кам бўлмади. Унинг инстаграм саҳифасига ўн миллионлаб янги обуначилар қўшилди (турнир арафасида унда 50 минг атрофида ўқувчи бор эди, ҳозир бу миқдор 30 миллионга яқинлашди).
Аммо у турнир арафасида клубсиз қолганди – Португалиянинг иккинчи дивизиони вакили «Шавиш» у билан шартномани узайтирмасликка қарор қилганди.
Возиня ҳозир ҳам клубсиз, аммо фаолиятини якунлаш ниятида эмас. Медиада катта машҳурликка эришган посбонга қизиқиш бор, аммо фақат Америкадаги клублардан. Испания ва Аргентинага қарши ўйинларда қаҳрамонлик кўрсатган Возиняни «Интер Майами» ўз сафига қўшиб олиши кутилмоқда. Испаниядаги Marca нашрига кўра, клуб эгаларидан бири бўлган Дэвид Бекҳэмнинг шахсан ўзи уни жамоасида кўрмоқчи.
