G‘azoda davom etayotgan Isroil hujumlari va dron bilan to‘qnashgan samolyot – kun dayjesti

O‘tgan kun davomida jahonda ro‘y bergan eng asosiy voqea va yangiliklar sharhi bilan kundalik xabarnomada tanishtiramiz.

Isroil G‘azoda 3 kishini o‘ldirdi

Dushanba kuni G‘azo markazida Isroilning havo hujumi oqibatida uch nafar falastinlik, jumladan, bir bola halok bo‘ldi. Bu haqida G‘azo sog‘liqni saqlash idorasiga tayanib Reuters ma’lum qildi.

G‘azoning taxminan 60 foiz qismini bosib olgan Isroil harbiylari havo zarbasi berilganini tasdiqladi, biroq batafsil ma’lumot bermadi. G‘azo sog‘liqni saqlash vazirligining bildirishicha, Isroil zarbasi ertalab sektor markazidagi Dayr al-Balah shahrida sodir bo‘lgan.

Sog‘liqni saqlash idorasi ma’lumotlariga ko‘ra, shanbadan beri Isroil harbiylari tomonidan o‘n ikki nafar falastinlik — sakkiz erkak va to‘rt bola o‘ldirilgan.

Bundan tashqari, bosib olingan G‘arbiy sohildagi Al-Bira shahrida o‘tkazilgan reydda falastinlik o‘smir Isroil askarlari tomonidan otib o‘ldirilgan. Isroil harbiylari ushbu voqeani o‘rganayotganini bildirdi.

Isroil o‘tgan yil oktyabr oyida AQSh vositachiligida Hamas bilan otashkesimga kelishganiga qaramay G‘azoga qayta-qayta zarbalar berib kelmoqda.

Sulh davrida G‘azoda 1045 falastinlik – ularning aksariyati tinch aholi va Isroilning to‘rt nafar askari halok bo‘lgan.

Isroil tomoni bu harakatlarini G‘azodagi askarlariga tahdid solayotganlarni nishonga olayotgani bilan izohlamoqda.

Hamas esa Isroilni otashkesimni buzishda ayblaydi. G‘azo bo‘yicha Tinchlik kengashi vakili Nikolay Mladenov esa har ikki tomon ham kelishuvni buzganini aytmoqda

Prokurorlar Tashiyevga 9 yil so‘radi

Bishkekning Birinchi may tuman sudida hokimiyatni zo‘ravonlik bilan tortib olishga tayyorgarlik bo‘yicha jinoiy ish ko‘rib chiqilmoqda. Ishning bosh figuranti – Qirg‘iziston Milliy xavfsizlik davlat qo‘mitasining sobiq rahbari Qamchibek Tashiyev hisoblanadi.

Navbatdagi sud majlisi 29 iyun kuni sudya Aziret Mederov raisligida yopiq tartibda bo‘lib o‘tdi.

Qirg‘iziston OAVlariga ko‘ra, muzokaralarda prokurorlar — ish bo‘yicha barcha ayblanuvchilarni aybdor deb topishni va ularga 9 yilga ozodlikdan mahrum qilish jazosi tayinlashni so‘ragan.

Tergov organlari maxsus xizmat sobiq rahbarini quyidagi moddalar bo‘yicha ayblamoqda:

• Hokimiyatni zo‘ravonlik bilan tortib olishga tayyorgarlik ko‘rish;

• Mansab vakolatlarini suiiste’mol qilish.

Qamchibek Tashiyev 2026 yil 10 fevral kuni Vazirlar Mahkamasi raisining o‘rinbosari — Milliy xavfsizlik davlat qo‘mitasi rahbari lavozimidan olingandi. Keyinchalik unga nisbatan jamoatchilik orasida «75-ish» nomi bilan tanilgan jinoiy ish qo‘zg‘atilgan.

Ushbu ish doirasida Qamchibek Tashiyev bilan birga yana yetti kishi sudlanmoqda. Ular orasida sobiq bosh prokuror va parlamentning sobiq spikeri ham bor.

Jinoiy ish sudga oshirilgandan so‘ng undagi materiallar maxfiylashtirilgan, shu sababli majlislar yopiq eshiklar ortida o‘tkazilmoqda.

Monakoda portlash: ukrainalik oligarx yaralandi

Fransiya bilan Monako chegarasi yaqinidagi turar joy binosi kirish qismida kuchli portlash sodir bo‘ldi. Oqibatda uch kishi jarohatlangan, ulardan ikki nafarining ahvoli o‘ta og‘ir.

Monako rasmiylariga ko‘ra, voqea dushanba kuni mahalliy vaqt bilan soat 21:00 lar atrofida sodir bo‘lgan. Hodisada binoning foyesida tashlab ketilgan sumka portlab ketgan.

AFP xabariga ko‘ra, yaralanganlar orasida o‘z mamlakatida sanksiyaga uchragan ukrainalik taniqli oligarx Vadim Yermolayev bor. Uning ahvoli o‘ta og‘ir va hayoti xavf ostida qolmoqda.

Oligarx bilan birga bo‘lgan ayol ham o‘ta og‘ir tan jarohati olgan. Shuningdek, portlashda «katta ehtimol bilan ushbu juftlikka aloqador bo‘lgan» 13 yoshli bola ham jarohatlangan. Portlash to‘lqini tufayli derazalarning sinishi natijasida yana to‘rt kishi yengil jarohatlar olgan.

Monako jamoat prokurori Stefan Tibolt gumondor shaxs portlovchi moslama joylashtirilgan ryukzakni binoning kutish zalida qoldirib, so‘ng qochib ketganini ma’lum qildi.

Portlash — bolt va shariklar bilan to‘ldirilgan qo‘lbola portlovchi moslama yordamida sodir etilgan. Odatda, bunday elementlar jarohat yetkazish quvvatini oshirish uchun ataylab qurilmaga joylashtiriladi.

Rasmiylarga ko‘ra, gumondor hujumdan keyin piyoda Fransiya chegarasini kesib o‘tgan. U Monako va Fransiyaning qo‘shni Bozosoleyl shaharchasidagi videokuzatuv kameralariga muhrlangan. Hozirda politsiya xodimlari va favqulodda vaziyatlar xizmati voqea joyiga safarbar etilgan.

AQShda samolyot dron bilan to‘qnashdi

Dushanba kuni JetBlue aviakompaniyasining samolyoti Nyu Yorkdagi Jon Kennedi aeroportiga yaqinlashayotganda dron bilan to‘qnashdi. AQSh Federal aviatsiya boshqarmasi surishtiruv ishlarini boshladi.

Boshqarma ma’lumotlariga ko‘ra, Las-Vegasdan uchib kelgan Airbus A321 samolyoti uchuvchisi qo‘nishga yaqinlashayotgan paytda — taxminan 914 metr balandlikda to‘qnashuv yuz berganini ma’lum qilgan.

Shu bilan birga parvoz hech qanday ko‘ngilsizliklarsiz yakunlangan va yo‘lovchilar odatdagidek samolyotni tark etishgan.

«Havo kemasi parvozdan keyingi ko‘rik uchun xizmatdan olindi va tekshiruv davomida hech qanday shikastlanish yoki to‘qnashuv izlari aniqlanmadi», deyiladi kompaniya bayonotida.

AQShda davom etayotgan futbol bo‘yicha Jahon chempionati o‘yinlari ortidan aeroportlar va boshqa barcha obektlarda «talabning keskin ortishiga» tayyorgarlik ko‘rish so‘ralgan.

AQSh Federal qidiruv byurosining ma’lum qilishicha, turnir boshlanganidan buyon o‘yinlar o‘tayotgan 11 ta mezbon shahardagi taqiqlangan havo hududlaridan 500 dan ortiq dronlar musodara qilingan.

Aviatsiya boshqarmasiga ko‘ra, dronlar aeroportlar yaqinida uchmasligi kerak, chunki parvoz paytida uchuvchilar uchun ularni ko‘rish va to‘qnashuvdan qochish juda qiyin. Boshqarmaning qo‘shimcha qilishicha, aeroportlar yaqinida dron ko‘rilgani haqida har oyda 100 dan ortiq xabar kelib tushmoqda.

Shuningdek, ruxsat etilmagan dron operatorlari yirik miqdordagi jarimaga tortilishi yoki qamoq jazosiga mahkum etilishi mumkinligi haqida qat’iy ogohlantirildi.

Germaniyada otishma

Germaniyaning Shtade shahri markazidagi bolalar va yoshlar muassasasida yuz bergan otishmada olti kishi halok bo‘ldi. Hujumda gumonlanib Hannoverda istiqomat qiluvchi, kelib chiqishi turk bo‘lgan 45 yoshli Germaniya fuqarosi qo‘lga olindi.

Otishma oqibatida to‘rt nafar ayol va ikki nafar erkak halok bo‘lgan. Ularning barchasi voyaga yetmaganlar ishlari bo‘yicha mahalliy boshqarmaning xodimlaridir.

Quyi Saksoniya ichki ishlar vaziri ushbu fojiani «siyosiy yoki iqtisodiy motivlarga ega bo‘lmagan, sovuqqonlik bilan sodir etilgan zo‘ravonlik harakati» deb baholadi.

Politsiya boshlig‘i Katrin Shuol esa jinoyatning taxminiy sababi vasiylik huquqi ustidagi nizo ekanini ma’lum qildi.

Shuolning so‘zlariga ko‘ra, gumondor dushanba kuni muassasaga o‘zining uch oylik qiziga vasiylik qilish masalasi ko‘rib chiqiladigan yig‘ilishga chaqirilgan edi. Qizaloq va uning 34 yoshli onasi ushbu markazda vaqtincha istiqomat qilgan. Hujum paytida ularga zarar yetmagan.

Otishmadan so‘ng gumondor avtomashinada voqea joyidan qochishga uringan, biroq politsiya ta’qibidan keyin qo‘lga olingan. Nemis OAVlariga ko‘ra, huquq-tartibot idoralariga ushbu shaxs tomonidan ehtimoliy tahdid borligi avvaldan ma’lum bo‘lgan. Biroq politsiya ma’lumotlar bazasida u «o‘ta zo‘ravonlikka moyil shaxs» sifatida qayd etilmagan.