Shavkat Mirziyoyev: Yoshlar Uchinchi Renessans poydevorini yaratadigan kuch bo‘lishi kerak

Prezident ta’kidlaganidek, mamlakatda islohotlarning ilk kunlaridan yoshlarni qo‘llab-quvvatlash va ularning orzu-intilishlarini ro‘yobga chiqarish davlat siyosatining ustuvor yo‘nalishi etib belgilangan.

Qayd etilishicha, har bir mahallada yoshlar yetakchilari faoliyati yo‘lga qo‘yildi, nuroniylarning hayotiy tajribasidan yoshlar tarbiyasida keng foydalanilmoqda, har haftaning payshanba kuni esa «Yoshlar kuni» deb e’lon qilinib, barcha davlat idoralari yoshlar muammolarini hal etishga safarbar qilingan.

Davlat rahbari so‘nggi yillarda erishilgan natijalarga ham to‘xtalib, «Yoshlar daftari» orqali 1,5 million nafar yoshning muammolari hal etilganini, yosh tadbirkorlar soni besh barobar oshib 287 mingdan oshganini qayd etdi. Shuningdek, xorijiy tillarni o‘rganayotgan yoshlar soni 3,5 millionga yetgani, iqtidorli o‘quvchilar xalqaro fan olimpiadalarida 434 ta, yosh sportchilar esa xalqaro musobaqalarda 2 ming 245 ta medalni qo‘lga kiritgani ta’kidlandi.

Prezident yoshlar jinoyatchiligi ikki yilda 2,5 barobar kamayganini qayd etar ekan, bu sohada hali hal qilinishi lozim bo‘lgan vazifalar ko‘pligini ta’kidladi. Shu munosabat bilan vazirlar, hokimlar, rektorlar, texnikum va maktab direktorlari yoshlarning muammo va ehtiyojlari bilan tizimli shug‘ullanishi zarurligi ko‘rsatib o‘tildi.

Uchrashuvda prezident zamonaviy dunyoda bilim, ilm-fan va innovatsiyalar hal qiluvchi omilga aylanganini qayd etib, yoshlarga shunday murojaat qildi: «Ajdodlarimiz insoniyat taraqqiyoti uchun qanday buyuk ishlar qilgan bo‘lsa, sizlar Yangi O‘zbekistonda yangi uyg‘onish davri – Uchinchi Renessans poydevorini yaratadigan kuch bo‘lishingiz kerak».