Qoʻshimcha funksionallar
-
Tungi ko‘rinish
Shavkat Mirziyoyev Sergelidagi zamonaviy xususiy tibbiyot markazi bilan tanishdi
Prezident Shavkat Mirziyoyev Toshkent shahrining Sergeli tumanida joylashgan Global International Hospital xususiy ko‘p tarmoqli tibbiyot markazi faoliyati bilan tanishdi. Davlat rahbari markazda yaratilgan zamonaviy sharoitlarni ko‘zdan kechirib, xususiy tibbiyot hamda tibbiy turizmni yanada rivojlantirish bo‘yicha muhim vazifalarni belgilab berdi.
Davlat rahbari Sergeli tumanida joylashgan Global International Hospital xususiy ko‘p tarmoqli tibbiyot markazida bo‘lib, muassasa faoliyati va aholiga ko‘rsatilayotgan tibbiy xizmatlar bilan tanishdi.
30 million dollar investitsiya hisobiga barpo etilgan mazkur markazda aholiga talab yuqori bo‘lgan ko‘plab tibbiy yo‘nalishlar bo‘yicha xizmatlar ko‘rsatilmoqda. Muassasa yiliga 150 ming nafardan ortiq bemorga xizmat ko‘rsatish quvvatiga ega bo‘lib, yillik xizmatlar hajmini 15 milliard so‘mga yetkazish rejalashtirilgan.
Prezidentga markazning jarrohlik, reanimatsiya va davolash bo‘limlari, shuningdek, situatsion markaz faoliyati taqdim etildi.
Loyiha doirasida 250 ta yangi ish o‘rni yaratilgan. Muassasada xorijda malaka oshirgan yuqori malakali mutaxassislar va chet ellik shifokorlar ham faoliyat yuritmoqda. Markaz Buyuk Britaniya, Italiya va Germaniyadan keltirilgan zamonaviy tibbiy jihozlar, jumladan, PHILIPS kompaniyasining ilg‘or uskunalari bilan jihozlangan.
Davlat rahbari ayrim yo‘nalishlar bo‘yicha ushbu markazni tayanch tibbiyot muassasasiga aylantirish muhimligini ta’kidlab, bu yerda to‘plangan ilg‘or tajriba asosida shifokorlar malakasini oshirish va zamonaviy tibbiy xizmatlar qamrovini kengaytirish yuzasidan mas’ullarga tegishli ko‘rsatmalar berdi.
Prezident tibbiyot markazi xodimlari bilan muloqotda xususiy tibbiyotni qo‘llab-quvvatlash, aholiga sifatli tibbiy xizmat ko‘rsatish va tibbiy turizmni rivojlantirish masalalariga alohida e’tibor qaratdi.
