Polsha poytaxti Varshava shahri aeroportida mamlakatning vakolatli organlari tomonidan xalqaro qidiruvda bo‘lgan O‘zbekiston fuqarosi Interpolning O‘zbekiston milliy markaziy byurosi vakillariga rasman topshirildi.
Ma’lum qilinishicha, mazkur shaxs yirik miqdordagi firibgarlik jinoyatini sodir etganlikda ayblanib, Interpol kanallari orqali xalqaro qidiruvga berilgan edi.
Ekstraditsiya jarayoni O‘zbekistonning Polshadagi elchixonasi ko‘magida, Toshkent va Varshava Interpol milliy markaziy byurolari o‘rtasidagi ikki tomonlama muzokaralar, axborot almashinuvi hamda hamkorlikdagi tezkor-qidiruv tadbirlari natijasida amalga oshirildi.
Interpol kanallaridan samarali foydalanish orqali qidiruvdagi fuqaroning transchegaraviy harakatlari aniqlanib, u Polsha hududida qo‘lga olingan.
Polsha vakolatli organlarining ijobiy qaroridan so‘ng qidiruvdagi shaxs sud oldida javobgarlikka tortilishi uchun O‘zbekiston huquq-tartibot idoralari xodimlariga topshirildi.
