23 iyul kuni kunning ikkinchi yarmiida Namangan viloyati Yangiqo‘rg‘on tumanida do‘l yog‘di.
Ijtimoiy tarmoqlarda tarqalgan foto va videolarda do‘l kuchli bo‘lgani, yo‘llar deyarli oq rang bilan qoplanganini ko‘rish mumkin.
Hodisa vaqtida yo‘llarda transport vositalari harakatlanishi qiyinlashgan, mevali daraxtlarga zarar yetgan.
«O‘zgidromet» xabariga ko‘ra, bu hodisa qo‘shni Qirg‘izistondan konvektiv do‘lli bulut kirib kelishi natijasida sodir bo‘lgan. Hududda soat 12:29 dan 12:34 gacha bo‘lgan vaqt oralig‘ida do‘l yog‘ishini to‘xtatish va qishloq xo‘jaligi mahsulotlarini uning salbiy ta’siridan himoya qilish maqsadida 18 dona «Alazan-6» do‘lga qarshi vositalaridan foydalanilgani ma’lum qilindi.
«Alazan-6» – bu qishloq xo‘jaligi ekinlari, bog‘lar va tokzorlarni kuchli do‘l yog‘ishidan himoya qilish uchun mo‘ljallangan 82 mm kalibrli maxsus do‘lga qarshi raketa hisoblanadi. Bunday raketalar do‘l hosil qiluvchi bulutlarning eng yuqori qismiga uchiriladi. Ular bulut ichida maxsus reagent (ko‘pincha kumush yodid) sepadi. Bu jarayon do‘l donalari o‘sishini to‘xtatib, ularni yomg‘irga yoki mayda, xavfsiz qor zarralariga aylantiradi.
Namangan viloyatida bundan oldin ham do‘lga qarshi vositalar qo‘llangandi. Xususan, 1, 11 va 12 may kunlari jami 57 dona «Alazan-6» do‘lga qarshi vositasi qo‘llanib, do‘l jarayoni zaiflashtirilgan.
