Rossiya Davlat statistika xizmati - Rosstat ma’lumotlariga ko‘ra, joriy yilning iyun oyida neft mahsulotlari ishlab chiqarish indeksi o‘tgan yilning mos davriga nisbatan 21,8 foizga pasaygan.
Taqqoslash uchun, may oyida ushbu ko‘rsatkich yillik hisobda 13,5 foizga kamaygan edi. Demak, iyun oyida pasayish sur’ati yanada kuchaygan.
Tabiiy hajmlar e’lon qilinmaydi
RBK nashrining yozishicha, Rosstat mazkur indeksni tovarlar «savatchasi» qiymatini doimiy bazaviy narxlarda hisoblash orqali shakllantiradi. Hozirgi hisob-kitoblarda 2023 yil bazaviy davr sifatida qabul qilingan.
Nashr ta’kidlashicha, Rossiya hukumati qaroriga ko‘ra, mamlakatda neft mahsulotlari ishlab chiqarishning tabiiy hajmlari (tonna yoki boshqa fizik o‘lchovlarda) haqidagi ma’lumotlar ommaga e’lon qilinmaydi.
Yonilg‘i narxlari o‘sishi sekinlashgan
Rosstat ma’lumotlariga ko‘ra, Rossiyada benzin va dizel yonilg‘isi narxlari o‘sishi ham biroz sekinlashgan.
20 iyul bilan yakunlangan haftada benzin narxi 1,7 foizga oshgan. Oldingi hisobot haftasida esa bu ko‘rsatkich 2,3 foizni tashkil etgan.
Dizel yonilg‘isi narxi esa 1,9 foizga qimmatlashgan. Bir hafta avval o‘sish 3,2 foiz bo‘lgan.
Ukraina hujumlari yoqilg‘i inqirozini kuchaytirdi
2026 yil yozida Ukraina tomonidan Rossiyaning neft omborlari va neftni qayta ishlash zavodlariga uyushtirilgan hujumlar kuchayishi ortidan mamlakatda to‘liq masshtabli urush boshlanganidan buyon eng jiddiy yonilg‘i tanqisligi yuzaga keldi.
Reuters agentligi bahosiga ko‘ra, ukrain dronlari zarbalari natijasida Rossiyaning neftni qayta ishlash quvvatlarining taxminan 25 foizi to‘liq yoki qisman ishdan chiqqan.
Bu holat ayrim hududlarda yonilg‘i sotuviga cheklovlar joriy etilishiga olib kelgan. Shu bilan birga, Rossiya rasmiylari bozordagi vaziyat asta-sekin barqarorlashayotganini ta’kidlamoqda.
