O‘zbekiston tashqi ishlar vaziri Baxtiyor Saidov Salvadorning yangi elchisi Yuriy Pavel Santakrus Perdomoni qabul qildi.
TIV rahbarining ma’lum qilishicha, uchrashuvda elchidan ishonch yorliqlari qabul qilindi hamda unga diplomatik faoliyatida muvaffaqiyatlar tilandi. Shuningdek, O‘zbekiston Salvadorni Markaziy Amerikadagi istiqbolli sheriklaridan biri sifatida ko‘rishi va mamlakatlar o‘rtasidagi siyosiy, savdo-iqtisodiy, investitsiyaviy hamda boshqa sohalardagi hamkorlikni izchil rivojlantirishdan manfaatdor ekani ta’kidlandi.
Tomonlar ikki davlat munosabatlarini yangi bosqichga olib chiqish uchun yaqin hamkorlik qilishga tayyor ekanini bildirdi.
Ma’lumot uchun, O‘zbekiston va Salvador o‘rtasida diplomatik munosabatlar 2014 yil 3 dekabrda o‘rnatilgan. Yuriy Pavel Santakrus Perdomo qarorgohi Moskva shahrida joylashgan holda Salvadorning Rossiya, Armaniston, Belarus, Qozog‘iston, Qirg‘iziston, Tojikiston va Turkmanistondagi elchisi ham hisoblanadi.
